Almatynyń A.P.Chehov atyndaǵy ortalyq qalalyq kitaphanasynda kóktem merekesine oraı «Áıel – ana, áıel – nury ǵalamnyń» degen taqyryp sheńberinde áserli kesh ótti.
Kitaphananyń jas oqyrmandarymen júzdesýge «Almaty aqshamy» gazetiniń bólim redaktory, Qazaqstan Jýrnalıser odaǵynyń múshesi Nurjamal Álisheva, belgili dástúrli ánshi, Qazaqstannyń eńbek sińirgen qaıratkeri Aıgúl Qosanova, respýblıkalyq «Aıgólek» jýrnalynyń tilshisi Aıym Altaıqyzy jáne búrkitshi arý Aıajan Danıarqyzy shaqyrylǵan eken.
Qoǵamnyń ár salasynda eńbek etip júrgen osynaý názik jandy meımandar áıel-ananyń orny, qazaq qyzynyń bolmysy, sondaı-aq meıirim, jylylyq, otbasy, qazaqy qundylyqtar týraly oılarymen bólisti. Oqyrmandar tarapynan qoıylǵan túrli saýaldarǵa jaýap berip, syrlasý keshin odan ári árlendire tústi. Oqyrmandardy ásirese, Aıajan Danıarqyzynyń Aryn atty búrkiti kóbirek qyzyqtyrǵandaı. Jas qusbeginiń bul joldy qalaı tańdaǵanyn surap jatty jastar. Biz endi tanylyp kele jatqan búrkitshi boıjetkenmen aldaǵy ýaqytta keńirek suhbat quratyn bolamyz.
Úkili dombyrasyn qushaqtaı kelgen Aıgúl ánshi merekelik keshtiń boıaýyn qanyqtyra túsken «Ádemi qyz» ánin shyrqap berdi. Al Aıym arý sıasy kebe qoımaǵan óleńin oqyp berdi.
Meımandar men jas oqyrmandar birigip qyzyqty oıyn oınady. Ol da eki tarapty jaqyndastyrýǵa dáneker bolǵany anyq. Kesh sońyna qaraı arýlarǵa er azamattar iltıpat kórsetti. Atap aıtsaq, jas aqyndar Erjan Jumabek pen Maǵaz Retbek qyz-kelinshekterge, áıel-analarǵa degen júrekjardy tilegin jyr arqyly jetkizdi.
Meımandarǵa usynylǵan qyzǵaldaqtar da kóktem jarshysyndaı bolyp júrekterdi jylytty.