Almatyda Qazaqstan Respýblıkasynyń Prezıdenti janyndaǵy Qazaqstannyń strategıalyq zertteýler ınstıtýty qabyrǵasynda belgili qytaıtanýshy ǵalym Klara Hafızovanyń «XVIII–XIX ǵasyrlardaǵy dala bıleýshileri jáne olardyń dıplomatıasy» kitabynyń tanystyrylymy ótti.
Bul is-shara Qazaqstan Respýblıkasynyń Prezıdenti janyndaǵy Qazaqstannyń strategıalyq zertteýler ınstıtýtynyń qurylǵanyna 30 jyl tolýyna arnalǵan sharalar keshenin bastaıdy.
Monografıa Qazaq handyǵy bıleýshileriniń úsh urpaǵynyń eki ǵasyr boıy qazaq memlekettiligin, aýmaqtyq tutastyǵyn jáne ulttyq birligin saqtaý jolyndaǵy qyzmetine arnalǵan. Monografıanyń avtory – belgili qytaıtanýshy, tarıh ǵylymynyń doktory, halyqaralyq qatynastar tarıhy, Qytaıdyń syrtqy saıasaty, Ortalyq Azıa jáne Qazaqstan–Qytaı qatynastary jónindegi bilikti maman Klara Shaısultanqyzy Hafızova. Klara Shaısultanqyzy - birneshe iri monografıalar men jınaqtardyń jáne de Qytaıda, Reseıde, Aýǵanstanda, Iranda, Anglıada, Ýkraınada, Japonıada osy elderdiń tilderinde jarıalanǵan kóptegen maqalalardyń avtory.
İs-shara Qazaqstannyń strategıalyq zertteýler ınstıtýtynyń dırektory Erkin Tuqymovtyń alǵysózimen bastaldy.
«Klara Shaısultanqyzy asa qıyn baǵyt – qytaıtaný salasynda eńbek etip júrgen naǵyz ǵalymnyń qaısarlyǵynyń úlgisi. Klara Shaısultanqyzynyń janqıarlyq qyzmeti jas zertteýshi-ǵalymdardy táýelsiz Qazaqstannyń shyǵystaný jáne qytaıtaný ǵylymdarynyń damýyna úles qosýǵa shabyttandyrady. Qazaqstanda qytaıtaný mektebi áli qalyptasý satysynda, sondyqtan Klara Shaısultanqyzynyń eńbegi sekildi árbir monýmentaldy týyndynyń quny altynmen baǵalanady. Qytaıtaný – qajetti bilim kólemin, quzyrettilik deńgeıin, qytaı tilin bilýdi jáne t.b. eskeriletin kúrdeli baǵyt. Sondyqtan búgingi tańda QSZI qytaıtaný boıynsha zertteýlerdiń bastamashysy bolyp, osy baǵyttyń damýyna yqpal etýi mańyzdy. Sebebi, erte me, kesh pe júıeli mekteptiń qalyptasary daýsyz», – dedi ınstıtýt dırektory.
Eske sala keteıik, tuńǵysh qytaıtanýshy qazaq qyzy Klara Hafızova «XVIII–XIX ǵasyrlardaǵy dala bıleýshileri jáne olardyń dıplomatıasy» kitabyn jazýmen 50 jyldan beri aınalysyp júrgenin aıtqan bolatyn.
«Bul kitap meniń jarty ǵasyrlyq Qazaqstan–Qytaı qarym-qatynasynyń tarıhyna arnalǵan eńbegimniń jemisi. Eger buryn bul taqyrypty ekonomıkalyq jáne saıası máseleler turǵysynan qarastyrsaq, bul kitap órkenıettik kózqarasqa baǵyttalǵan. Qazirgi tańda álem muraǵattary ashylyp jatyr, túrli memlekettik baǵdarlamalar bar, soǵan sáıkes adamdar saıahattap, biregeı materıaldar ákeledi. Ózim aýdarǵan kóptegen túpnusqa materıaldar da bar. Zertteý ádisim mynadaı: aldymen materıaldardy aýdaryp, ashyq jarıalaımyn, sodan keıin solardyń negizinde óz eńbekterimdi jazamyn. Sol arqyly bizdiń zertteýshiler jumysqa synı turǵydan qaraýǵa múmkindik alady. Alaıda, bul aýdarmalardy jasaý óte qıyn boldy. Sebebi, olar kóne qytaı tilinde jazylǵan bolatyn», – deıdi Klara Shaısultanqyzy.