Aq halatty abzal jandardyń ishinde únsiz eńbek etip, óz isimen ǵana kózge túsetin jandar bolady. Solardyń biri – Pedıatrıa jáne balalar hırýrgıasy ǵylymı ortalyǵynyń Kardıoreanımasıa bóliminde on úsh jyldan beri meıirger bolyp qyzmet etip júrgen Jomart Sabyruly AHSHAEV. Ol tek kásibı maman ǵana emes, júregi jumsaq, sabyry mol, janyn sala jumys isteıtin naǵyz meıirban jan. Dárigerler men Balalardy qorǵaý kúni merekesi qarsańynda biz onymen balalardyń densaýlyǵy, aýyr dertpen kúres, ata-ananyń róli men meıirger mamandyǵynyń máni jaıly áńgime qurdyq.
– Jomart myrza, aq halattylardyń qatarynan kóriný bala kúngi armanyńyz ba edi? Aldymen ózińiz týraly aıtyp ótseńiz…
– Men 1984 jyly Jarkent qalasynda dúnıege keldim. Áke-sheshem sol jaqta turady, áli kúnge deıin týǵan jerden alystamaǵan qarapaıym adamdar. Ózim 2003 jyly Almaty qalalyq medısınalyq kolejine oqýǵa túsip, 2007 jyly támamdadym. Sodan beri medısına salasyndaǵy eńbek jolym bastaldy. Alǵashqy bes jyl Ortalyq klınıkalyq aýrýhanada eresekter bóliminde eńbek ettim. Keıinnen 2012 jyly Pedıatrıa ortalyǵynda kardıoreanımasıa bólimi ashylǵanda, balalarmen jumys isteýge bet burdym. Sol kezden beri bala júrekterimen birge ómir súrip kelemin.
– Balalarmen jumys isteý eresekterge qaraǵanda ózgeshe shyǵar...
– Iá, olar – basqa álem. Balada aram oı bolmaıdy. Olardyń jany taza. Dárigerlerge senimmen qaraıdy. Olar aýyrsa – shynymen aýyrady. Kúlimdese – shyn júregimen kúlimdeıdi. Mundaı sátter bizge de kúsh beredi. Bala tez saýyǵady, óıtkeni ol ómirdi qalaıdy. Al úlken adamdar keıde ózinen úmit úzip alady…Al balalar – kerisinshe, ómir súrý úshin kúresedi. Sol sebepti em de jaqsy sińedi, tez jazylyp ketedi. Árıne, bul ata-ananyń qoldaýyna da baılanysty.
– Jumys kezinde janaryńyzǵa jas tolǵan sátter boldy ma?
– Iá… Eń este qalǵan oqıǵam – Almas degen jigit boldy. Ol kezde eresekter bóliminde jumys istep júrgenmin. Dostary ony eki kún boıy tappaı qalyp, MCHS shaqyrady. Páterge kirgende, es-tússiz jatqan. Basynan qatty jaraqat alǵan eken. Soqqy. Mıdyń ishine qan quıylǵan. Alty aı boıy bizdiń reanımasıada jatty. Sheshesi – qarapaıym jumysshy. Kúnde keshke kelip, únsiz jylaıtyn. Al jigittiń qalyńdyǵy kún saıyn reanımasıanyń aldyna kelip, eki saǵattaı otyryp qaıtatyn. Kúnde-kúnde. Eshkimnen eshteńe suramaıdy, ne ketip qalmaıdy. Tek kútedi. Únsiz úmit... Keıin Almas esin jıdy. Odan keıin taǵy bir neırohırýrgıalyq ota jasaldy. Sol kezde qaıta kezdestik. Ýaqyt ótti. Bir kúni aýrýhana syrtyna shyqsam, qarsy aldymda Almas tur. «Jomart aǵa, men úılendim. Sol qyzǵa… Ol meni kútti», – dedi. Sol men qarap, kútip, emdegen pasıentimniń baqytty sáti áli esimnen ketpeıdi. Qatty qýanǵan edim. Iyǵynan qaǵyp, baqyt pen uzaq ǵumyr tiledim.
– Mundaı aýyr bólimde jumys isteý úshin qandaı qasıetter kerek dep oılaısyz?
– Eń aldymen sabyr. Bul jerde emosıaǵa berilseń, jumys isteý qıyn. Ár balanyń jaǵdaıy aýyr, biraq biz bar kúshimizdi salyp, aman alyp qalýǵa tyrysamyz. Birte-birte etiń úırenedi. Biraq ár sátiń mańyzdy – keıde bir mınýt keshikseń, bala ómirine qaýip tónedi.
– Jumystaryńyz mańyzdy bolsa da, kóp kózge túse bermeısizder. Bul aýyr tımeı me?
– Biz dańq úshin emes, jan úshin jumys isteımiz. Balanyń tynysy qalpyna kelip, ananyń kózine kúlki oralsa – biz úshin sol jetistik. Meıirgerdiń mindeti – dál, júıeli, shyn kóńilmen kútim jasaý. Dárigerdiń taǵaıyndaýyn úlken jaýapkershilikpen, tıanaqty oryndaý. Balanyń jaǵdaıyn saǵat saıyn baqylaý, dárisin ýaqytyly berý, dáretine deıin tirkeý, jórgegin aýystyrý, sýyn ólsheý… Bul – qarapaıym is emes. Bul – ómir úshin kúres.
– Balanyń jylaýy keıde bizge túsiniksiz kórinedi. Sizder qalaı anyqtaısyzdar?
– Bala bekerden-beker jylamaıdy. Árbir mazasyzdyqtyń sebebi bar. Meıli ol ishki aýrý, meıli jórgegi aýysatyn ýaqyt... Biz bárin tekseremiz. Sebebi bala sóılemeıdi, ol tek jylaý arqyly syryn jetkizedi. Sondyqtan bizge qyraǵylyq pen sezimtaldyq asa qajet.
– Ata-analarǵa qandaı keńes berer edińiz?
– Eń bastysy – sabyr jáne dárigerlerge senim. Ata-ana kúmándansa, balaǵa da keri áser etedi. Ekinshiden, bala – názik. Ony ursyp emes, túsinistikpen tárbıeleý kerek. Dárini ýaqytynda berý, jaqsy kútim jasaý – bári óte mańyzdy. Biz balańyz úshin qoldan kelgenniń bárin jasaımyz. Sabyrly bolyńyzdar. Balalar ata-anasynyń kúıin sezedi. Eger siz kúızelseńiz – bala da kúızeledi. Al bizge keregi – sizdiń sabyryńyz men balańyzǵa senimińiz» dep aıtar edim.
– Sizdińshe, meıirger mamandyǵy qandaı qurmetke laıyq?
– Biz kózge kóp kórine bermeımiz, biraq bizdiń jumys – tirshilikpen teń. Aýyr, ári jaýapty. Aılyǵymyz joǵary emes. Biraq bul – júrektiń isi. Eger meıirger bolam deseń, janyńda meıirim, boıyńda tózim, al júregińde senim bolýy kerek.
– Ýaqyt bólip, júrekke jyly áser qaldyrǵan áńgimeńiz úshin alǵys aıtamyz. Siz sıaqty jankeshti, sabyrly mamandardyń eńbegi – balalar densaýlyǵynyń eń senimdi tiregi. Qyzmetińizge tabys, al shańyraǵyńyzǵa amandyq tileımiz!
Suhbattasqan Quralaı IMANBEKQYZY