Bizdiń halyqty túsiný qıyn bop barady. Myna tájtajaldyń beti qaıtar túri joq. Sol indetpen dúnıejúzi halqymen birge qarsy kúresý, saqtaný sharalaryn jasaýdyń, sol bále juqty ma, analız tapsyryp bilýdiń ornyna, biz neshe túrli áńgime taratyp, odan qalsa, kerek kezinde PTR spravka, vaksınalyq pasport satyp alý jaǵyn qarastyramyz da. Janym aý, ol PTR, sol ekpe seniń óz densaýlyǵyń, jeke basyńnyń amandyǵy úshin kerek emes pe? Joq, biz anyqtama satyp alamyz da, "Mınıstrdi ornynan alý kerek", "Olımpıadada jerde qarap qaldyq" dep ǵalamdyq áńgimeler aıtamyz..
Sosyn tanysymyz tájtajaldan qaıtys bop jatsa, "qoı, odan emes shyǵar" dep bet sıpaımyz. Úkimet dym istemeıdi dep qoıamyz taǵy da. Beıqambyz. Eki jylǵa qarady, bul álemdi jaılaǵan indetten árqaısymyz ózimiz saqtanýymyz kerek ekenin áli túsinbeımiz. Joǵaryda aıtqandaı, jalǵan qujat jasatyp, qylmysqa baramyz.
QR İİM resmı málimeti boıynsha, sońǵy kúnderde jalǵan medısınalyq qujattar jasaý faktisi boıynsha 110 qylmystyq is qozǵalypty. Onyń 50-i vaksına aldy degen jalǵan medısınalyq pasport boıynsha, 60-y jalǵan PTR anyqtamasyn jasaǵany úshin. Mınıstr E.Turǵymbaevtyń resmı málimdemesi boıynsha, elde jalǵan medısınalyq qujat jasaýdyń júıesi qalyptasqan eken. Ol sqema boıynsha emhanalar men áýejaı, týrısik agenttikterde, basqa da jerlerde belgili bir adamdar jumys jasaıtyn kórinedi. Osyndaı zańsyz da "qarjyly" qyzmeti úshin 20 medısına qyzmetkeri, 8 deldal ustalǵan.
Al Almaty áýejaıynda "medısınalyq pasportty" 100 myń teńgeden satqan adam ustalǵan. Bul ne bop ketti? Qasiretten de qarjy jasaıtyn zaman bolǵan ba?! Qaıda baramyz? Kimdi aldaımyz? Túsinbeı otyrmyz.