Kıim kıý úlgisi biraz dúnıeni ańǵartady
El arasynda «kıimine qarap qarsy alady, sózine qarap shyǵaryp salady» deıtin maqal-mátel bar. Muny kóbine slaván jurty kóp qoldanady. Osyǵan qarap kóp nárseniń baıybyna barýǵa bolady. Biz súrip otyrǵan qoǵamnyń ózi de osyny talap etip turǵandaı.
Jarasymdy kıim - adamnyń ajary. Qazir modanyń neshe túri shyqqan. Tipti kóz ilespeıdi. Qyzyǵasyz, tańǵalasyz. Bir jaǵy, sán álemine jetip úlgermeımiz. Óıtkeni, kúnine qanshama jańa dúnıelerge jolyǵamyz. Áleýmettik jeli arqyly tamashalaımyz. Bálkim, zamannyń talaby da solaı bolyp turǵan shyǵar.
Jastar bárin «trend» termınimen ólsheıdi. Sol arqyly kıimniń naryqtaǵy quny baǵalanady. Sońǵy ýaqyttary ulttyq naqyshtaǵy dúnıeler kópshilikke qaıta tanylyp kele jatyr. Birshama ýaqyt boıy kózden ǵaıyp bolǵandaı bolyp edi. Munysy qýantady. Kóńilimizdi jadyratady. Jas jigitter qys mezgiline arnalǵan bórik kıip júredi. Endi bireýler ishik, Doji Gavana syndy brendke qushtar. Árıne, ol úshin qomaqty qarajat ta kerek. Bylaısha aıtqanda, árkim "kórpesine qaraı kósiledi".
Amerıkalyq jantaný ilimin zertteýshiler kıimge qarap kisiniń minez qulqyn, júris-turysyn, sóıleý ádebin ańǵarýǵa bolatynyn dáleldegen. Bul búgin ǵana paıda bolǵan boljam emes, sonaý ǵasyrlardan belgili dúnıe sıaqty. Sebebi baılar padıshalar jibek, barqyn matalarynan kıim tiktirip kıse, patshaıymdar neshe túrli áshekeı taǵynǵan. Sodan-aq qaı dárejedegi adam ekeni belgili. Soǵan saı minezi de bolady.
Al qazirgi tańda jappaı uqsastyq oryn alǵan. Sál burynyraqta qyzyldy-jasyldy dúnıe tek qyz-kelinshekter qaýymyna jarasatyndaı kórinetin. Búginde ol qaǵıdat múlde basqasha kórinis tapqan. Osydan-aq arǵy jaǵyn baǵamdaı berińiz!
Qorytý. Qazaqta «Adam kórki - shúberek, aǵash kórki - japyraq» dep jatady. Ony ras. Jarasymdy kıim adamnyń ishki syrtqy jan dúnıesine óz áserin bereri anyq. Aıtarymyz, bastysy, úılesim tapsa bolǵany.