Kıikterdi atýǵa resmı túrde ruqsat berildi.
Úkimet qaýlysy bir aı buryn qabyldanyp qoıǵanyn májilismen Dúısenbaı Turǵanov rastady, dep habarlaıdy Almaty-akshamy.kz Ktk.kz-ke silteme jasap.
Biraq kıiktiń etin, múıizin qalaı paıdalanatyny ázirge pysyqtalmaǵan. Eki jyldan beri sozbalańǵa salynyp kelgen máselege qatysty túpkilikti sheshimniń qabyldanǵanyn ekologıa mınıstrligi ázirge habarlaǵan joq.
«Habarym bar. Resmı túrde ruqsat berilgen. Osy aıdyń basyndaaý deımin. 300 myńǵa jýyq kıikti atýǵa bolady degen. Biraq ádisin de, sodan keıin etin, múıizin qaıda jiberetinin, qalaı paıdalanatyny sol áli sheshilmegen syńaıly», - dedi Májilis depýtaty Dúısenbaı Turǵanov.
Sońǵy sanaq boıynsha elimizdegi aqbóken sany 2 mıllıonǵa jetip jyǵylǵan. Ásirese batys aımaqtardaǵy sharýalardyń egistigin otap, berekesin alǵannan keıin prezıdent jaýapty vedomstvaǵa tıisti sheshim shyǵarýdy tapsyrǵan-dy. Odan beri salaǵa jaýapty mınıstr eki ret aýysyp úlgerdi. Ekologıa mınıstrligi shetelden ǵalymdar aldyryp, talqylaımyz degenshe, bıyl oblys sharýalaryna kıikten kelgen zalal 8 mıllıard teńgege jýyqtaǵan. Aqbókender 1 mıllıon 284 myń gektar jaıylym-shabyndyqty taptap, 5 myń gektar egindi otap ketipti. Qazir tıisti esep-qısap Úkimetke jiberilgen.
«Sol óziniń aýmaǵyna jaqyn úsh et kombınatymen ázirlikteri pysyqtalýda. Bul úsh kombınat táýligine 1900 basqa deıin soıa alatyn múmkindikterin kórsetip otyr. Tońazytqysh kameralary 4 myń tonnalyq istep turǵan. Bul Jańaqaladaǵy et tońazytý kombınaty jáne Aqjaıyq aýdanynda ornalasqan et soıý orny. Endi onyń ar jaǵynda óńdeý jumysy Kýbleıde. Erteń bul bastalǵan ýaqytta sonda óńdeletin bolady», - dedi BQO Aýyl sharýashylyǵy basqarmasynyń basshysy Naýryzbaı Qaraǵoıshın.
.