Almatynyń «Tomırıs» áıelder komandasy «Almaty aqshamy» men «Vechernıı Almaty» basylymdarynyń ambassadory atandy
Almatynyń «Tomırıs» áıelder komandasynyń kásibı basketbolshy qyzdary jaqyn kúnderi Serbıaǵa attanyp, halyqaralyq arenada Qazaqstannyń namysyn qorǵaıdy.
Basketbol - álemdegi eń tanymal komandalyq sport túrleriniń biri ekeni sózsiz. Dúnıejúziniń kil myqtylary jınalǵan NBA jarysynyń fınalyn ótken jyly 12 mıllıonnan astam adam tamashalaǵan.
Bul kórsetkish qalyń kópshilik arasynda basketbolǵa degen qyzyǵýshylyqtyń joǵary deńgeıin baıqatady. Elimizde de sary-qyzyl dopqa qyzyqqandar az emes. Er-jigitter arasyndaǵy kásibı jáne áýesqoı komandalar kóp jyldardan beri ishki birinshilik pen halyqaralyq jarystarda baq synap júr. Endigi kezekte qyzdar arasyndaǵy kásibı basketboldy damytý úshin Qazaqstannyń ár óńirinde arnaıy áıelderge arnalǵan komandalar ashylyp jatyr.
Atap aıtqanda, ótken jyly Almaty qalasynda qalalyq Sport basqarmasynyń bastamasymen basketbol boıynsha «Tomırıs» áıelderdiń kásibı komandasy quryldy. Bir jyl ishinde áıgili Tomırıs patshaıymnyń atyn alǵan basketbolshy qyzdar bedeldi jeńisterge jetken. Onyń ishinde ótken aıdyń 13-shi juldyzynda Astana qalasynda ótken irikteý týrnırindegi jeńisti erekshe atap ótýge bolady. İshki irikteýde úzdik bolǵan almatylyq qyzdar jaqyn kúnderi Serbıaǵa attanyp, halyqaralyq arenada Qazaqstannyń namysyn qorǵaıdy.
- Buryn «Otyrar» basketbol komandasyna qaraıtyn «Tomırıs» basketbol komandasy bolǵan. Alaıda bul joba uzaqqa barmaı jabylyp qaldy. Araǵa 20 jyl salyp 2022 jyly Almaty qalasynyń ákimdiginiń qoldaýymen «Tomırıs» komandasy qaıta jandandy. Osy ýaqyt aralyǵynda qalamyzda áıelder basketboly múldem bolmady deýge bolmaıdy. Tek qazirgi tańda sport áýesqoıdan kásibı keıipke aýysty. Biz komanda qurylǵan sátten bastap, basketboldy damytýdyń 2 baǵytyn tańdadyq: klasıkalyq basketbol – 5h5 jáne 3h3 formaty. Qazirgi tańda komanda basshylyǵy jas sportshylardy qoldaýǵa asa mán beredi. Basketbolshy qyzdarymyzdyń orta jasy 16-19 jas deýge bolady. Degenmen qatarymyzda tájirıbeli sportshylar da joq emes. Osy maýsymǵa komandamyzǵa syrttan 2 legıoner qosyldy. Sondaı-aq, halyqaralyq jarystardan tájirıbesi bar basketbolshymyz – Elızabeta Mıtınany sapymyzda saqtap qaldyq, – dedi «Tomırıs» kásibı basketbol klýbynyń dırektory Balaýsa Alpysbaeva.
Klasıkalyq basketboldan 2022/2023 maýsymynyń nátıjesi boıynsha almatylyq qyzdar pleı-off kezeńine deıin jetken. Odan bólek komanda jetistikteriniń qatarynda 18 jastan asqan basketbolshylar arasyndaǵy 3h3 jarystan QR Kýbogynyń qola júldesi, 18 jasqa deıingi 3h3 jarystan QR Kýbogynyń kúmis júldesi jáne 3h3 formaty boıynsha QR birinshiliginiń chempıondyǵy, sonymen qatar ishki irikteý týrnıriniń jeńisi bar. Klýb dırektorynyń aıtýynsha, almatylyq komanda 3h3 basketbol jarysynda respýblıka boıynsha kósh bastap tur.
- Kóptegen jyldar boıy jumys istep kele jatqan basketbol klýbtarda qalyptasqan júıe bar. Olar daryndy balalarǵa arnalǵan mektep-ınternattarymen tyǵyz baılanys ornatqan. Sport mektepteriniń basketbol bólimindegi er balalar ary qaraı qaıda, qalaı baratynyn naqty biledi. Biraq biraz ýaqyt boıy basketbolshy qyzdarda mundaı múmkindik bolmady. Sondyqtan biz qyzdar úshin naqty qurylym qalyptastyrýǵa tyrysyp jatyrmyz. Búgingi kúni komandamyzdy kúsheıtý úshin ózge qalalardyń jáne sheteldiń basketbolshylaryna nazar aýdaryp otyrǵanymyz jasyryn emes. Mysaly, tamyz aıyndaǵy irikteý týrnırine biz Tamıla Jaqypovany «Irtysh» klýbynan arnaıy shaqyrtýmen aldyrdyq. Tamıla ózge qyzdarymyzben birge Serbıada Qazaqstan namysyn qorǵap, jarys aıaqtalǵan soń, óz klýbyna qaıtyp oralady. Sondaı-aq, osy maýsymǵa komandanyń bas bapkeri retinde lıtvalyq jattyqtyrýshy taǵaıyndaldy. Bolashaqta «Tomırıs» komandasynyń atynan tolyqtaı Almatyda tárbıelengen qyzdar óner kórsetedi dep úmittenemiz. Jáne de komanda quramynda baq synap, sporttyq mansabyn aıaqtaǵan basketbolshy qyzdardy bapkerlikke shaqyrý da josparda bar, – deıdi Balaýsa Alpysbaeva.
Qazirgi sátte «Tomırıs» komandasy tek Almaty qalasynyń emes, barsha Qazaqstan namysyn qorǵap, Serbıada ótetin halyqaralyq jarystan jeńispen oralýdy maqsat etip otyr. Komanda sapynda Altynshash Zınabdın, Adelá Mýstafına, Elızabeta Mıtına jáne Tamıla Jaqypova óner kórsetedi. Aıta ketken jón, atalmysh halyqaralyq jarystan bastap almatylyq basketbolshy qyzdar «Alatau Aqparat» JSHS-nyń atyn shyǵaryp, «Almaty aqshamy» jáne «Vechernıı Almaty» basylymdaryna ambassador bolady. Osy oraıda, «Tomırıs» basketbolshylary qonaqjaı «Alatau Aqparat» shańyraǵyna kelip, Bas dırektor Erjan Qalymbaıulynyń qabyldaýynda boldy. Kezdesý barysynda basketbolshy qyzdarǵa arnaıy syılyqtar tabystaldy. Óz kezeginde Erjan Qalymbaıuly «Tomırıs» komandasyna aldaǵy jarystarda jeńis tiledi. «Almaty aqshamy» redaksıasy da basketbolshy qyzdardyń Eýropanyń tórinde, barsha álemniń aldynda kók týymyzdy jelbiretip, iri jeńisterge jetýlerine tilektes.
