Ortalyq kommýnıkasıalar qyzmetiniń brıfıńinde ekologıa jáne tabıǵı resýrstar mınıstri Erlan Nysanbaev jýrnalısiń suraǵyna jaýap berdi.
Ol kıikterdi atý orny nelikten qupıa ekenin túsindirdi, dep habarlaıdy Almaty-akshamy.kz.
"Munda, birinshiden, qaýipsizdik máselesi bar. Ekinshiden, egistik, shabyndyq oryndaryn saqtaý kerek. Halyqty dúrliktirip otyrǵan keı azamattar bar. Kıiktiń sany azaısa, meniń de qabyrǵam qaıysady. Biraq búginde kıik sany kóbeıdi, sondyqtan muny retteý kerek", – dedi ol.
Mınıstrdiń sózinshe, kelesi jyly kıikter sany 2,6 mıllıon basqa jetedi. Al onyń 1,6 mıllıony BQO aýmaǵyn mekendeıdi eken.
"Bul aımaqtaǵy jaıylym kólemi osynsha kıikti qamtamasyz ete almaıdy. Saldary jutqa ákep soǵýy múmkin. Onyń ústine ǵalymdardyń sózinshe, Oral kıikteri Betpaqdala kıikterine qaraǵanda usaqtaý. Sebebi Betpaqdala jaıylym keń, shóp jetkilikti. Tipti kıikterdiń arasynda shópke talas kúsheıgen. Sizderden tyǵylyp atyp otyrǵanymyz joq", – dep qosty mınıstr.
Erlan Nysanbaev kıik atý ornynyń qupıa bolýy kóleńkeli bıznestiń órkendeýine ákep soqpaıtynyn málimdedi.
"Kıik atý máselesi tyń baqylaýda, shtabtar qurylǵan. Olardyń quramynda túrli memlekettik organ ókilderi bar. Sondaı-aq orman men ań sharýashylyǵy komıteti, ishki ister mınıstrliginiń aımaqtardaǵy ókilderi kıikti jasyryn atý faktilerin boldyrmaý úshin áreket etedi", – deıdi Erlan Nysanbaev.
Eske salaıyq, buǵan deıin ekologıa jáne tabıǵı resýrstar mınıstri Erlan Nysanbaev alapat órt shyqqan “Semeı ormany” rezervaty jumysshylarynyń jalaqysy qanshaǵa óskenin aıtqan edi.