Almaty jáne Almaty oblysynyń ákimderi aldaǵy bes jylda Almaty aglomerasıasyn damytý perspektıvalaryn talqylady
Almaty ákimi Erbolat Dosaev pen Almaty oblysynyń ákimi Marat Sultanǵazıev Qonaev qalasynda aglomerasıanyń Jergilikti keńesiniń jıynyn ótkizdi, dep habarlaıdy almaty-akshamy.kz
Talqylaýdyń negizgi kún tártibi Memleket basshysy Q.K. Toqaevtyń tapsyrmasyn iske asyrý aıasynda ázirlengen Almaty aglomerasıasyn 2029 jylǵa deıin damytýdyń Keshendi josparynyń jobasy (budan ári – DKJ jobasy) boldy.
«Keshendi damý jospary óńirdegi turǵyn úı, áleýmettik, ınjenerlik jáne kólik ınfraqurylymynyń damýyn úndestirýi jáne teńestirýi tıis. Biz úshin aglomerasıa turǵyndarynyń kólikke qoljetimdiligi mańyzdy, sonda ǵana olar qalaǵa erkin jete alady. Demek, kólikti damytý ÚAAJ-na deıingi jáne odan keıingi barlyq aýmaqty qamtýdy eskere otyryp júrgizilýi kerek. Sondaı-aq, josparlarda-tartylys núkteleri bolýy tıis. Bul - jumys oryndaryn qurý, ómir súrýge laıyqty jaǵdaı jasaý jáne t.b.», - dedi Almaty ákimi Erbolat Dosaev óziniń sózinde.
DKJ jobasyn ázirleý 2023 jylǵy qańtarda qabyldanǵan «Aglomerasıalardy damytý týraly» Zańnyń arqasynda múmkin boldy. DKJ ázirleýshiler «Almatybasjospar ǴZI» JSHS jáne Almaty oblysynyń sáýlet jáne qala qurylysy basqarmasy bolyp tabylady.
«Almaty aglomerasıasyn damytý óńirdiń ornyqty ekonomıkalyq jáne áleýmettik damýyn qamtamasyz etý úshin strategıalyq mańyzdy basymdyq bolyp tabylady», - dedi Almaty oblysynyń ákimi Marat Sultanǵazıev ári Almaty aglomerasıasynyń el aýqymyndaǵy mańyzyn atap ótti. Qazaqstan aýmaǵyndaǵy aglomerasıanyń úlesi 0,61%, el halqynda-17%, el ekonomıkasynda 21,3%.
DKJ jobasynda qoljetimdi turǵyn úı jáne áleýmettik nysandar salý, sapaly ınjenerlik ınfraqurylym qurý jáne t. b. kózdeledi.
Jobada KPR jobasymen túzetilgen Almaty qalasynyń kólik qańqasyn damytýdyń ázirlenip jatqan sheber jospary sheńberinde qala men oblys arasyndaǵy kólik baılanysyn jaqsartý máselesine erekshe nazar aýdaryldy. Sheber josparda kólik jelilerin, onyń ishinde qoǵamdyq kólikti damytýǵa, temirjol tasymalynyń sapasyn arttyrýǵa baǵyttalǵan birqatar is-shara kózdelgen. Qala mańyndaǵy aımaqtardyń turǵyndary úshin kóliktik qoljetimdilikti jaqsartý úshin jańa marshrýttar uıymdastyrylady. Sondaı-aq, oblys boıynsha jyldam ári yńǵaıly júrýge múmkindik beretin birneshe kólik- aýysyp otyrý toraptarynyń qurylysy josparlanyp otyr. Bul magıstraldyq joldardyń ótkizý qabiletin jáne qoǵamdyq kóliktiń tartymdylyǵyn arttyrady.
DKJ jobasynda óndiristi damytý jáne jańa oryndardy uıymdastyrý úshin shaǵyn ónerkásiptik parkter qurý, Indýstrıaldy aımaqty keńeıtý, óndiristerdi oblys aýmaǵyna kóshirý kózdelgen. Sonymen qatar, DKJ jobasynda ishki týrızmdi damytýǵa basa nazar aýdaryldy. Aglomerasıaǵa Týrgennen Qaskeleńge deıingi taýly týrısik klaster kiredi.
Jumys kezdesýi barysynda búdjettiń tıimdiligi men ashyqtyǵyn arttyrý, shyǵystardyń qaıtalanýyn boldyrmaý jáne ónimsiz shyǵyndardy qysqartý maqsatynda DKJ jobasy aıasynda is-sharalar sanyn 245-ten 174-ke deıin qysqartý týraly sheshim qabyldandy. Jobany qarjylandyrýdy respýblıkalyq jáne jergilikti búdjetter aıasynda da, jeke ınvestısıalar esebinen de júrgizý josparlanýda.
Keńes qorytyndysy boıynsha ákimder merzimderdi belgiledi – osy jyldyń qazan aıynyń sońyna deıin DKJ jobasy Almaty qalasy men Almaty oblysynyń máslıhatyna kelisýge jiberiledi. Memleket basshysynyń tapsyrmasy boıynsha bul qujat 2023 jyldyń sońyna deıin Qazaqstan Respýblıkasy Úkimetiniń qaraýyna jáne bekitýine usynylady.
Anyqtama: Jergilikti aglomerasıa keńesiniń quramyna qala qurylysy, sáýlet, kólik, kásipkerlik, áleýmettik jáne qarjy salalary máselelerine jetekshilik etetin máslıhat depýtattary, táýelsiz sarapshylar, Almaty qalasy jáne Almaty oblysy ákimderiniń orynbasarlary endi.
Aglomerasıa - bul bir nemese birneshe iri qalalardyń aınalasyndaǵy eldi mekenderdiń jınaqtalǵan klasteri. Negizi Almaty bolyp tabylatyn Almaty aglomerasıasyna aýdandyq mańyzy bar qalalar, 31 aýyldyq okrýg jáne shamamen 3 mln adam turatyn 98-ge jýyq eldi meken kiredi. Aglomerasıa aýmaǵy óziniń óńirlik damý josparlary men memlekettik josparlaýdyń basqa da baǵdarlamalary bar 2 ákimshilik-aýmaqtyq birlikti (Almaty q.jáne Almaty oblysy) qamtıdy.