Bizge Jańa Qazaqstandy jasaıtyn jańashyl, otanshyl, sergek, bilimdi urpaq kerek.
Almaty qalasy máslıhatynyń depýtaty, M.Áýezov atyndaǵy Ádebıet jáne óner ınstıtýtynyń dırektory Kenjehan MATYJANOV Jańa Qazaqstandy qandaı azamattar quratyny týraly pikirimen bólisti, dep habarlaıdy Almaty-akshamy.kz.
Almaty qalasy málıhatynyń depýtaty Kejehan MATYJANOVTYŃ pikirinshe, Memleket basshysy Úkimettiń kúni keshe ótken keńeıtilgen otyrysynda elimizdiń jahandyq kúrdeli geosaıası syn-qaterlerge qaramastan, birqalypty damyp kele jatqanyn atap ótti. Oǵan bárimiz kýámiz jáne jaqsy jaǵynan damı berýine tilekshimiz dep sanaıdy.
"Degenmen, qazir barǵa qanaǵat dep toqmeıilsip otyratyn ýaqyt emes. Prezıdentimiz biraz olqylyqtyń atyn atap, túsin tústep berdi. Máselen, ınflásıa údep barady. Ony sarapshy-mamandar ǵana emes, qarapaıym halyq ta kórip, sezinip otyr. Qazir kim-kimniń aıtatyny da qymbatshylyq. Memleket basshysy otandyq ónimderge basymdyq berý kerektigin tilge tıek etti. Jasyratyny joq, biz keıde ózimizdiń ónim men sheteldik buıym qatar tursa, jat eldiń jyltyraǵyna qol sozatynymyz ras. Bizge bálkim, patrıottyq sezim jetpeı jatqan shyǵar. Biz sanaǵa turmystyń ústemdik etkenin qalamaımyz. Bizge Jańa Qazaqstandy jasaıtyn jańashyl, otanshyl, sergek, bilimdi urpaq kerek", - deıdi depýtat.
Kenjehan MATYJANOV Prezıdent bilim salasynda da qordalanǵan másele kóptigin atap ótkenin aıtty.
"Kúni keshe Bilim jáne ǵylym mınıstrligi ekige bólingenin bilemiz. Bul tyń qadam sol máselelerdi sheshý úshin qajet bolǵany da aıqyn. Elimizde jetkinshekterge qosymsha bilim berý jaqsy jolǵa qoıylǵan. Bul – órenderdiń qarym-qabiletin, shyǵarmashylyǵyn damytý úshin qolǵa alynǵan tyń bastama. Qosymsha sporttyq jáne shyǵarmashylyq bilim berý isine de memleket tapsyrysy boıynsha qarjy bóline bastaǵany quptarlyq qadam", - deıdi depýtat.
Onyń pikirinshe, bul úıirmeler men seksıalarǵa qatysatyn balalar sanyn 70 paıyzǵa deıin arttyrǵan.
«Bilimge salynǵan qarajat memleket úshin eń basty ınvestısıa bolýy kerek. Bul – óte mańyzdy másele. Túptep kelgende, damýdyń birden-bir joly – bilim salasy. Sondyqtan budan eshkim utylmaıtyny sózsiz. Úkimet pen ákimder jurtshylyqpen birlesip, jobany jetildirýge tıis. Ony sapaly ári tıimdi jasaý qajet. Naqty ǵylymdar men ınjenerıa salasy boıynsha qosymsha bilim berýge aıryqsha nazar aýdarý kerek. Balalardy dene shynyqtyrý jáne akademıalyq turǵydan birdeı damytý qajet. Aýyldyq jerde turatyn balalarǵa basa mán bergen jón. Barlyq aımaqtaǵy balalardyń qosymsha bilim alýyna múmkindigi bolýǵa tıis», – dedi Memleket basshysy.
Kenjehan MATYJANOV endi Úkimet pen jańa mınıstrlikterdiń ókilderi otandyq bilim men ǵylym salasyn tyń serpinmen damytýǵa kúsh salatynyna senetinin aıtty.