M.Áýezov atyndaǵy Ádebıet jáne óner ınstıýtynyń dırektory, fılologıa ǵylymdarynyń doktory Kenjehan Matyjanov óziniń Facebook jelisindegi paraqshasynda Almatyda oryn alǵan jappaı tártipsizdikke qatysty pikir bildirdi, dep habarlaıdy Almaty-akshamy.kz
Buryndary vırtýaldy ómirden tamashalap, ishimizdi tartyp júrgen úreıli oqıǵalardyń dál bizdiń qazaq elinde oryn alýy júregimizdi qan jylatty! KESHE ǴANA JAINAP TURǴAN ALMATY QAZİR QANDAI KÚIGE TÚSTİ?! Barshamyzdyń maqtanyshymyz emes pe edi!? Qalaı ǵana qoly baryp, kózi qıyp qıratty eken?!
Halqymyzdyń "Jarańdy jatqa bildirme", "Dosqa kúlki, dushpanǵa taba bolma", "Ózińdi óziń syılasań, jat janynan túńiledi", "Bıtke ókpelep, tonyńdy otqa jaqpa" degen sıaqty halyq danalyǵyn qalaısha esten shyǵardyq!? "Jaý joq deme, jar astynda..." degenniń keri keldi.
Aınalaıyn aǵaıyndar, eger biz otbasymyzdyń berekesin tilesek, halqymyzdyń qamyn oılasaq, elimizdiń erteńine alańdasaq, esimizdi jıyp, jedel sabyrǵa kelýimiz qajet. Nıeti buzyqtardyń arandatýyna erip, dúleı kúshtiń jeteginde ketip, orny tolmas ókinishke tap bolǵan baýyrlar, raılaryńnan qaıtyńdar! Týǵan eliń, halqyń, jurtyń, otbasyń, ata-anań, bala-shaǵań úshin teńdessiz baqyt - týǵan Otanymyzdaǵy erkin eńbek pen alańsyz beıbit ómir. Egemendiktiń arqasynda basymyzǵa ornaǵan baǵymyzdyń qadirine ózimiz jetpesek, janymyzdy salyp qorǵamasaq, ony bizge eshkim de syıǵa tartpaıdy.
Sondyqtan da barsha qazaq eli, ózimizdiń Prezıdentimizdiń tóńiregine tastúıin bolyp toptasýymyz kerek. Osyndaı syn saǵatta bir týdyń astyna toptasý - bizdiń eldigimizge syn! Qandaı qıynshylyqty da dana halqymyz "bir jaǵadan bas, bir jeńnen qol shyǵara" otyryp jeńgen.
Biz bir bolsaq qana qaraly kúnderdi artqa tastap, jarqyn bolashaqqa jete alamyz!
Qaraly kún bizdiń birligimizdi burynǵydan da arttyra túsin!!! Qazaq eli tutas bolaıyq, bekem, berik bolaıyq!!! Sonda ǵana "jat janynan túńiledi"!