Geologıa salasyn damytý talqylandy
Qazaqstanda geologıalyq barlaýǵa salynatyn memlekettik ınvestısıa óte tómen. Bul týraly Ekologıa, geologıa jáne tabıǵı resýrstar mınıstri Serikqalı Brekeshev aıtty, dep habarlaıdy Almaty-akshamy.kz Egemen.kz-ke silteme jasap.
«Paıdaly qazbalardyń kóptegen túrleriniń rastalǵan qory boıynsha elimiz álemniń jetekshi elderiniń alǵashqy ondyǵyna kiredi. Bul rette paıdaly qazbalardy qarqyndy óndirýge baılanysty geologıa salasynyń aldynda turǵan basty syn-qateri –qorlardyń tolyqtyrý deńgeıiniń tómendigi. Óndirýdiń qazirgi deńgeıin alsaq, tıisti tolyqtyrýsyz kóptegen ıgeriletin ken oryndarynyń qory taıaý bolashaqta taýsylady. Osyǵan baılanysty, jer qoınaýyn memlekettik geologıalyq zertteýdi jandandyrý talap etiledi. Bul – keıinnen jer qoınaýyn paıdalanýǵa berý úshin perspektıvaly alańdar men obektilerdi anyqtaýdyń negizgi ádisi», - dedi Ekologıa mınıstri Úkimet otyrysynda.
Onyń aıtýynsha, 2020-2022 jyldary memlekettik salymdar kólemi 30 mlrd teńgeni quraǵan. Bul rette sońǵy jyldary memlekettik ınvestısıalardyń ulǵaıýy baıqalýda.
«Sonymen birge Qazaqstanda geologıalyq barlaýǵa 1 sharshy kılometrge salynatyn memlekettik ınvestısıalar kórsetkishi óte tómen. Bizde ol 11 AQSH dollary bolsa, Aýstralıada – 167 dollar, Kanadada – 203 dollar. Álemdik tájirıbe kórsetip otyrǵandaı, ınvestorlar óz qarajatyn memleket esebinen boljamdy resýrstary bar, perspektıvaly ýchaskeler bazasy qalyptasqan jumystardyń erte satylaryn júrgizgen nemese júrgizý ústindegi elderde ken oryndaryn barlaýǵa salady», - dedi S. Brekeshev.
Osyǵan baılanysty, Prezıdent tapsyrmalaryn oryndaý úshin geologıa salasynyń negizgi mindetteri bar.
«Birinshi – geologıalyq zerdelenýdi arttyrý jáne perspektıvaly ýchaskelerdi anyqtaý. Ekinshi – geologıa salasynyń ınfraqurylymy men geologıa ǵylymyn damytý. Úshinshi - óndiristik-tehnologıalyq prosesterdi sıfrlandyrý jáne avtomattandyrý. Tórtinshi – geologıalyq zertteýdiń ınvestısıalyq tartymdylyǵyn arttyrý, mıneraldyq-shıkizat bazasyn molaıtý úshin zańnamany jetildirý. Biz geologıa salasyn damytýdyń 2025 jylǵa deıingi tujyrymdamasyn ázirledik, onda joǵaryda atalǵan máselelerdiń sheshimi kórinis tapty», - dedi S. Brekeshev.