Quryltaıdyń ár aımaqta ótý sol óńirdiń damýyna serpin beredi.
Qazaqstan Prezıdenti Qasym-Jomart Toqaev Ulttyq quryltaıdyń kelesi otyrysyn kıeli Túrkistanda ótkizýdi usyndy, dep habarlaıdy Almaty-akshamy.kz Baq.kz silteme jasap.
«Ulttyq quryltaı týraly bastamany qoldaǵandaryńyz úshin barshańyzǵa rızashylyǵymdy bildiremin. Biz búgin quryltaı jumysynyń negizgi baǵdaryn aıqyndadyq. Bul qurylym demokratıa qundylyqtaryn ornyqtyrýǵa zor úles qosary sózsiz. Quryltaı jumysy munymen shektelip qalmaıdy. Biz jyl saıyn turaqty túrde kezdesip turamyz. Qazaq dalasynda el taǵdyry sheshilgen tarıhı oryndar az emes. Ulytaýdan bólek, Ordabasy, Mártóbe, Kúltóbe sıaqty qasterli jerlerimiz bar. Men kelesi basqosýdy kıeli Túrkistanda ótkizýdi usynamyn. Quryltaıdyń ár aımaqta ótý sol óńirdiń damýyna serpin beredi. Onyń músheleri ár joly bir óńirdiń tynys-tirshiligimen tanysady», - dep atap ótti Qasym-Jomart Toqaev.
Sonymen qatar ol aldymyzda aýqymdy jumys turǵanyn aıtty.
«Aldymyzda aýqymdy jumys bar. Eń bastysy, elimizde beıbitshilik pen turaqtylyq bolýy kerek. Onsyz Qazaqstannyń ósip-órkendeýi múmkin emes. Beıbitshilik pen turaqtylyqtyń ózegi el birligi ekenin este saqtaıyq. Halqymyz «Bereke basy – birlik» degen. Qazir álemdegi ahýal qubylmaly. Ony jaqsy bilesizder. Osy kúrdeli kezeńde aýyzbirshiligimizdiń myqty bolýy óte mańyzdy. Biz qıyndyqtyń bárin yntymaqtyń arqasynda eńserip kelemiz. Bolashaqta da osy joldan taımaýymyz kerek. Men halqymyzdyń jasampazdyq rýhyna kámil senemin. Qazaq eliniń mártebesi bıikteı bersin!» - dedi Memleket basshysy.