Premer-Mınıstrdiń orynbasary Serik Jumanǵarınniń tóraǵalyǵymen ótken jıynda Úkimettiń aýyl sharýashylyǵy jáne qarjy bloktarynyń, ákimdikter ókilderi kelesi jyly shegirtkeniń taralýyn boldyrmaýǵa arnalǵan daıyndyq jumystarynyń jaǵdaıyn talqylady, dep habarlaıdy Almaty-akshamy.kz.
Respýblıkalyq fıtosanıtarlyq dıagnostıka jáne boljamdar ádistemelik ortalyǵynyń derekteri boıynsha 2023-2024 jyldar shegirtkelerdiń taralý sıkliniń 11 jyldyq sharyqtaý shegi bolmaq. Sońǵy ret keri dınamıkanyń ósýi 2014 jyly baıqaldy. Odan keıin zıankesterdiń taralý aýmaǵy úzdiksiz azaıǵanmen, 2021 jyldan beri qaraı qaıtadan ulǵaıa bastady. 2024 jyly 2,5 mln gektar alqapqa shegirtke shoǵyry taralýy múmkin degen boljam bar. Bul 2023 jylǵa qaraǵanda (1,6 mln ga) 1,5 ese kóp. Shegirtkeler shoǵyry Aqtóbe, Qostanaı, Túrkistan, Jambyl oblystarynda kóp taralady dep kútilýde.
Aýyl sharýashylyǵy vıse-mınıstri Ábilqaıyr Tamabektiń málimetinshe, 2024 jylǵa bólingen 4,2 mlrd teńge qarjy jobalanǵan jer kóleminiń jartysyn ǵana óńdeýge jetedi. Shegirtke zıankesteriniń taralý alańynyń boljamdy kólemine óńdeý jumystaryn júrgizý úshin arnaıy búrikkish tehnıkanyń sanyn arttyrý qajet bolady. Pestısıdterdiń qolda bar qorynan bólek qosymsha qarjy bólinýi kerek.
«Shegirtkeniń taralýyna qarsy kúreske daıyndyqty kóktemde kesh bolmas úshin qazir bastaý kerek. Aýyl sharýashylyǵy mınıstrligi memlekettik satyp alýdy ýaqtyly ótkizip, shegirtkege qarsy is-sharalardy atqarýǵa tyńǵylyqty daıyndyqty qamtamasyz etýi qajet. Al Qarjy mınıstrligi men ákimdikter shegirtkeden qorǵaný sharalaryn uıymdastyrý úshin qosymsha qarjy bólýi kerek», - dep qorytyndylady sózin Serik Jumanǵarın.