2023 jyly OneWeb, SpaceX jáne SES kompanıalary Qazaqstan naryǵyna spýtnık ınternetin ákelýge múmkindik alady
Bul jaıynda QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Májilistiń baspasóz alańynda BAQ ókilderiniń saýaldaryna bergen jaýabynda málim etti, dep habarlaıdy Almaty-akshamy.kz QazAqparatqa silteme jasap.
«El arasynda «Ilon Masktiń ınterneti» dep atalatyn spýtnık ınterneti nege qazaqstandyqtarǵa áli qoljetimsiz?» dep surady jýrnalıser. Mınıstrdiń aıtýynsha, ol úshin áýeli Salyq kodeksine tıisti ózgeris engizý qajet. «Muny biz tómen orbıtaly spýtnık toptary dep ataımyz. Osy tehnologıaǵa qarjy quıyp otyrǵan birneshe kompanıa bar. Sonyń biri – OneWeb kompanıasy. Bul uıymmen pılottyq jobany pysyqtap jatyrmyz. Siz «Ilon Masktiń ınterneti» dep otyrǵan SpaceX kompanıasynyń Starlink jobasy da bar. Sondaı-aq, SES degen Lúksembýrg kompanıasy osy tehnologıa boıynsha ınternet usyna alady. Osy sıaqty basqa da kompanıalar bar. Olar da bul naryqqa kirgisi keledi. Bul máselede biz monopolıadan aýlaq bolǵymyz keledi. Iaǵnı, Qazaqstannyń naryǵyn birneshe operatorǵa ashamyz. Qazir nege ınfraqurylymyn salmaıdy degenge kelsek, qyzmettiń mundaı túri úshin salyq mólsherlemesi óte joǵary. Óıtkeni burnaǵy jyldary Salyq kodeksinde radıojıilikterdiń salyq mólsherlemesin bekitý kezinde mundaı tehnologıalardyń keletini eskerilmegen bolatyn. Sondyqtan, normany depýtattar qoldasa, bıyl ony qabyldaımyz», - dedi Baǵdat Mýsın.
Aıtýynsha, qazir atalǵan 3 operator normanyń qabyldanýy kútip otyrǵan kórinedi.
«Salyq kodeksine tıisti ózgeristi engizsek, kelesi jyldan bastap bul operatorlar naryǵymyzǵa kirip, Qazaqstannyń 4 núktesinde ınfraqurylym ornata bastaıdy. Olar bizdiń eldiń aýmaǵynda jumys isteýi úshin jer ústinde ınfraqurylym ornatylýy kerek. Biraq bul búkil elge optıka tartylady degen sóz emes. Tórt bazalyq núkte bolady. Solar spýtnıkten ınternet taratady», - dep túsindirdi vedomstvo basshysy.
Sondaı-aq, Baǵdat Mýsın buǵan deıin mundaı tehnologıanyń ónimine salyq mólsherlemesi belgilenbegenin aıtty. Eger ol mólsherleme naqty bekitilmese, atalǵan sheteldik kompanıalar naryqqa kelmeýi múmkin.
«Biz salyq mólsherlemesin engizbesek, olar kelmeıdi, kelgen kúnniń ózinde salyq tólemeıdi. Sondyqtan bıznestiń jańa túri salyq ákelip, halyqqa qyzmet kórsetýi úshin jaǵdaı jasaımyz. Atalǵan úsh operatordyń ekeýi testileý rejıminen ótti. Al Starlink operatoryn testileýdiń qajeti joq. Óıtkeni álemniń birqatar aımaǵynda óz tehnologıasyn taratyp otyr. Biz ol kompanıaǵa zańnamaǵa ózgeris engizgen soń aqparat beremiz dep keliskenbiz. Sodan keıin olar Qazaqstan naryǵyna kirý jumysyn bastaıdy. Eger bıyl depýtattar osy ózgeristerdi qabyldasa, kelesi jyly ınfraqurylym júrgizý bastalady. Sonda kelesi jyldyń aıaǵyna deıin halyqqa spýtnık ınterneti beriledi», - dedi mınıstr.