MÁMS jarnasyn qalaı tóleımiz?
Kelesi jyldan bastap biryńǵaı jıyntyq tólem (BJT) alynyp tastalady. Ózin-ózi jumyspen qamtyǵan azamattar aldaǵy ýaqytta MÁMS tólemderin qalaı tóleıdi? Bul medısınalyq saqtandyrý qorynyń sheshimi me? Osy jáne ózge de saýaldarǵa MSQ Almaty fılıalynyń dırektory Tileýhan Ábildaev jaýap berdi.
BJT qashan jáne qandaı maqsatpen engizildi?
Jalpy, biryńǵaı jıyntyq tólem (BJT) áýelde jeke kásipker retinde tirkelmegen, ózin-ózi jumyspen qamtyǵan azamattar úshin 5 jylǵa (2019 jyldyń 1 qańtarynan 2023 jyldyń 1 qańtaryna deıin) ýaqytsha engizilgen bolatyn. Búgingi kúnge deıin tólemniń bul túrin jeke qosalqy sharýashylyq ónimderin satatyn jáne ózge jeke tulǵalarǵa qyzmetter kórsetetin, jyldyq tabysy 1175 aılyq eseptik kórsetkishten aspaıtyn azamattar, jumyssyzdar, bala kútimi boıynsha bir jarym jasqa deıingi áleýmettik tólemderdi alǵysy kelgen júkti áıelder paıdalanyp keldi.
• Biryńǵaı jıyntyq tólem respýblıkalyq jáne oblystyq mańyzy bar qala turǵyndary úshin bir aılyq eseptik kórsetkish kólemin jáne basqa eldi mekenderdiń azamattary úshin 0,5 AEK quraıdy. Iaǵnı, bıyl BJT mólsheri tıisinshe 3 450 teńge jáne 1725 teńge.
«Biryńǵaı jıyntyq tólemniń negizgi jáne jalǵyz maqsaty – ózin-ózi jumyspen qamtyǵan azamattardy mindetti áleýmettik medısınalyq saqtandyrý, áleýmettik saqtandyrý jáne zeınetaqymen qamsyzdandyrý júıelerine tartý. Sondyqtan bul tólemderi tómen jeńildik kezeńi boldy. Qazir jeke tulǵalardyń tabysyn deklarasıalaý kezeń-kezeńimen engizilý ústinde. Buryn kásibin tirkemegen azamattar kásipker retinde tirkelip nemese jaldamaly qyzmetker bolyp jumys isteýi kerek», – dedi Tileýhan Ábildaev.
Kelesi jyly BJT ornyna basqa tólem túri engizile me?
Buǵan deıin BJT tólep kelgen azamattar 2024 jyldan bastap saqtandyrý júıesine derbes tóleýshi retinde qatysa alady. Tólem somasy 1 eń tómengi jalaqynyń 5 prosentin quraıdy. (2023 jyly – 3500 teńge). Atap aıtar bolsaq, buryn saqtandyrý statýsyn alý úshin ótken 12 aıdyń qaryzyn óteý qajet bolatyn. Qazir ózin-ózi saqtandyrǵysy keletin, resmı jumys istemeıtin azamat burynǵy bereshekti ótemeı, aldaǵy 12 aıǵa jarna tólep, bir jylǵa saqtandyrý statýsyn ala alady. Máselen, osy aıda medkómekke júginetin pasıent 2023 jyldyń shildesinen 2024 jyldyń maýsymyna deıingi aralyq úshin jarna aýdara alady.
Tileýhan Ábildaevtyń aıtýynsha, turaqty tabysy joq aýyl turǵyndarynyń (90 myńǵa jýyq adam) MÁMS júıesinen tys qalý qaýpi bar. Qazir osyǵan baılanysty aýyldyq aımaqtarda túsindirý jumystary júrgizilip jatyr.
Ázirshe, azamattar aldaǵy jarty jylda BJT-ny tóleı beredi. 2024 jyldan bastap tólemniń joǵaryda aıtylǵan túrlerin qarastyrý qajet bolmaq.
Tólem Qazaqstannyń ekinshi deńgeıli bankteri, bankterdiń mobıldi qosymshalary men «Qazposhta» bólimsheleri arqyly qabyldanady. Tólem jasaý úshin jeke sáıkestendirý nómirin, tólem jasalatyn aıdy kórsetý qajet.
MÁMS júıesine qatysty qosymsha suraqtar boıynsha emhanadaǵy «Pasıentterdi qoldaý qyzmetine» júginýge bolady. Sonymen qatar, Qordyń tómendegi baılanys arnalary arqyly ótinim qaldyra alasyz:
- fms.kz resmı saıty,
- Qoldau 24/7 mobıldi qosymshasy
- Telegramdaǵy SaqtandyrýBot
- 1414 Biryńǵaı baılanys ortalyǵy.