Cebebi, kóptegen mereke juma kúnine keledi eken.
QR Eńbek jáne halyqty áleýmettik qorǵaý mınıstrligi 2024 jylǵy demalys kúnderi týraly túsinikteme berdi, dep habarlaıdy Almaty-akshamy.kz.
Jańa 2024 jylǵa arnalǵan resmı demalys kúnderi – 1, 2 qańtar. 2023 jyldyń sońǵy senbi-jeksenbisi 30 jáne 31 jeltoqsanǵa sáıkes keledi. Osylaısha, aptasyna 5 kún jumys isteıtin qazaqstandyqtar 4 kún qatarynan demalysqa shyǵa alady.
Sodan keıin 3,4,5 qańtar – jumys kúni. Al 7 qańtar – Rojdestvo merekesi jeksenbi bolǵandyqtan, qosymsha demalys kúni berilmeıdi. Sáıkesinshe, 5 kún jumys isteıtinder 6,7 qańtarda ádettegideı demalady.
8 naýryz – Halyqaralyq áıelder kúni 2024 jyly juma kúnine keledi. Osylaısha, 5 kúndik jumys aptasyndaǵy qazaqstandyqtar 8,9,10 naýryz kúnderi úsh kún qatarynan demalady. Alty kúndik jumystaǵylar 8 naýryz demalyp, senbi – 9 naýryzda jumysqa shyǵady.
Naýryz merekesi 21-23 naýryz – beısenbi, juma, seni kúnderine túsedi. Senbi kúngi demalys dúısenbi – 25 naýryzǵa aýystyrylady. Iaǵnı, aptasyna 5 kún jumys isteıtinder 21, 22, 23, 24, 25 naýryz kúnderi bes kún demalady. Al 6 kún jumys isteıtinder 21, 22, 23, 24 naýryzda tórt kún demalyp, dúısenbi 25 naýryzda jumysqa shyǵady.
«QR merekeleri týraly» zańnyń 3-babyna sáıkes, mamyr aıynda qazaqstandyqtar úsh merekeni toılaıdy: 1 mamyr – Qazaqstan halqynyń birligi merekesi; 7 mamyr – Otan qorǵaýshy kúni; 9 mamyr – Jeńis kúni. Barlyq mereke kúnderi aptanyń ortasyna túsedi (1 mamyr – sársenbi, 7 mamyr – seısenbi, 9 mamyr – beısenbi). Sondyqtan qazaqstandyqtar bir kún demalyp, bir kún jumys isteıdi jáne taǵy bir kún demalyp, taǵy demalysqa shyǵady. Ázirge mınıstrlik mereke kúnderin aýystyrý týraly esh sheshim qabyldaǵan joq.
Dálirek aıtqanda, 5 kún jumys isteıtinder 1 mamyrda demalyp, 2-3 mamyrda jumys isteıdi, 4-5 mamyrda (senbi-jeksenbi) demalady. Dúısenbi 6 mamyrda jumys istep, 7 mamyrda demalady, 8-i kúni taǵy jumys istep, 9 mamyrda demalady. 10 mamyr juma kúni jumysqa shyǵyp, 11-12 mamyrda demalady.
Alty kúndik jumys aptasynda 1 mamyr – demalys, 2,3, 4 mamyr – jumys, 5 mamyr – demalys, 6 mamyr – jumys, 7-si – demalys, 8-i – jumys, 9-y – demalys, 10,11 mamyr – jumys, 12 mamyr – jeksenbilik demalys.
2024 jyly Qurban aıt merekesi shamamen 16 maýsymǵa sáıkes keledi, bul kúndi Eńbek mınıstrligi dinı basqarmamen birlesip belgileıdi. Bul kún jeksenbi bolǵandyqtan, qosymsha demalys kúni berilmeıdi.
6 shilde – Astana kúni memlekettik mereke bolyp sanalady. Keler jyly bul kún senbige túsedi, sondyqtan 5 kún jumys isteıtinder úshin demalys kúni dúısenbi 8 shildege aýystyrylady jáne úsh kún qatarynan demalady. Al 6 kún jumys isteıtinder 8 shildede jumysqa shyǵady.
30 tamyz – Konstıtýsıa kúni de memlekettik mereke. 2024 jyly bul kún jumaǵa túsedi, bes kún jumys isteıtinder 30,31 tamyz jáne 1 qyrkúıek kúnderi taǵy da úsh kún demala alady. Alty kúndik jumysta 30 tamyz – demalys, 31 tamyz – jumys, 1 qyrkúıek – jeksenbilik demalys.
Ótken jyly 25 qazan – Respýblıka kúni ulttyq merekesi qaıta oralǵan edi. Bul kún de 2024 jyly jumaǵa sáıkes keledi jáne úsh kún demalý múmkindigi bolady. Alty kún jumys isteıtinderge 25 qazan – demalys, 26 qazan – jumys, 27 qazan – jeksenbilik demalys.
Jyldyń sońǵy merekesi 16 jeltoqsan – Táýelsizdik kúni. Keler jyly Táýelsizdik kúni dúısenbige túsedi. Demek, 5 kúndik jumystaǵylarǵa 14, 15, 16 jeltoqsan – demalys. Al 6 kúndik jumystaǵylar – 14 jeltoqsan jumys istep, 15, 16 jeltoqsanda demalady.