13 joba boıynsha jobalaý-smetalyq qujattamalardy aıaqtaýǵa 340 mln teńge qarastyrylǵan.
2023 jyly Almatyda 8 park aımaǵyn qurý jáne rekonstrýksıalaý josparlanýda. Kókaldandyrý sharalaryna 2023 jylǵy búdjet jobasynda 6,8 mlrd teńge kózdelgen. Bul týraly shahar jetekshisi Erbolat Dosaev Almatynyń qalasynyń 2023-2025 jyldarǵa arnalǵan búdjet jobasyn qaraý barysynda aıtty, dep habarlaıdy Almaty-akshamy.kz.
Erbolat Dosaevtyń aıtýynsha,kelesi jyly 13 joba boıynsha jobalaý-smetalyq qujattamalardy aıaqtaýǵa 340 mln teńge qarastyrylǵan, onyń ishinde – Baým toǵaıy, Tuńǵysh Prezıdent parki, Saıran kóli, Úlken Almaty jáne Kishi Almaty ózenderi, D.A. Qonaev atyndaǵy Úlken Almaty kanaly, Alataý aýdanyndaǵy jańa «Sosnovyı bor» parki , sondaı-aq Atakent aýmaǵyn qaıta jańartý jobalary bar.
«Bıyl júrgizilgen zertteýlerdiń qorytyndysy boıynsha, sý basatyn 102 ýchaske anyqtaldy, onyń ishinde osy jyly 56 ýchaskede sý tasqynyn joıý jumystary aıaqtalady. 2023 jyly qalǵan 46 ýchaskede sý basý qaýpin joıý úshin, sondaı-aq 305,4 km aryq jelisi men nóser kanalızasıasyn rekonstrýksıalap, ári qaraı salý úshin 2023 jylǵy búdjet jobasynda 4 mlrd teńge kózdelgen», - dedi qala basshysy.
Ákimniń aıtýynsha, aýanyń lastaný kózderin anyqtaý, avtomatty monıtorıń júıesin engizý ekologıalyq monıtorıń júıesine qosymsha 500 dachıkti qosyp, qalanyń lastaný dárejesin dál baqylaýǵa múmkindik beredi. 2023 jylǵy búdjette 1 mlrd teńge josparlanǵan.