Jospar jobasy 24 zań jobasyn ázirleýdi kózdeıdi.
Qazaqstannyń Ádilet mınıstri Qanat Mýsın Úkimettiń 2023 jylǵa arnalǵan zań jobalaý josparynyń jobasyn tanystyrdy, dep habarlaıdy Almaty-akshamy.kz QazAqparatqa silteme jasap.
«Ádilet mınıstrligi memlekettik organdardyń usynystarymen Úkimettiń zań jobalaý jumystarynyń 2023 jylǵa arnalǵan jospary jobasyn daıyndady. Ony bıylǵy 15 qyrkúıekte Zań jobalaý qyzmeti jónindegi vedomstvoaralyq komısıasy maquldady», - dedi mınıstr búgingi Úkimet otyrysynda.
Bastapqyda jospar jobasynda Parlamentke 34 zań jobasyn ázirleý jáne engizý qarastyrylǵan. Keıinirek jospar jobasy Prezıdent Ákimshiliginiń eskertýlerimen pysyqtaldy.
Atap aıtqanda, zań jobalaryn Parlamentke engizý merzimderi qaıta qaraldy, sondaı-aq tujyrymdamalary tıisti talqylaýdy talap etetin birqatar bastama alynyp tastaldy.
«Sonymen qatar ortalyqsyzdandyrý boıynsha qosymsha 2 zań jobasy engizildi. Baıandalǵandy eskere otyryp, pysyqtalǵan Jospar jobasy 24 zań jobasyn ázirleýdi kózdeıdi, onyń ishinde Parlamentke birinshi jartyjyldyqta – 13 zań jobasyn, ekinshi jartyjyldyqta – 11 zań jobasyn engizý josparlanyp otyr. Jekelegen zań jobalary Vedomstvoaralyq komısıa maquldaǵannan keıin jospar jobasyna engiziledi. Mysaly, Búdjet kodeksi, Qala qurylysy kodeksi, mass-medıa máseleri jónindegi zań jobasy jáne basqalar», - dep túsindirdi Ádilet mınıstri.