Messendjerler men áleýmettik jelilerde taratylyp jatqan QR Prezıdentiniń Jarlyǵymen 2023 jylǵy 1 qańtardan bastap áıelderdiń zeınetke shyǵý jasy 58 jasqa deıin tómendeıtini, sondaı-aq Qazaqstanda 13-shi zeınetaqy tólemi engiziletini týraly aqparat shyndyqqa janaspaıdy, dep habarlaıdy Almaty-akshamy.kz.
Aıta keteıik, Memleket basshysynyń 1 qyrkúıektegi Qazaqstan halqyna Joldaýynda aıtylǵandaı, 2023 jylǵy 1 qańtardan bastap áıelderdiń zeınet jasyn kezeń-kezeńimen arttyrý 5 jyl merzimge 61 jas deńgeıinde toqtatylady.
«Zeınetaqy tólemderine qatysty qoldanystaǵy zańnamaǵa sáıkes azamattardy zeınetaqymen qamsyzdandyrý bazalyq jáne yntymaqty zeınetaqy, sondaı-aq azamattardyń mindetti zeınetaqy jarnalaryn aýdarý esebinen qalyptastyrylatyn Biryńǵaı jınaqtaýshy zeınetaqy qorynan tólem berý arqyly júzege asyrylatynyn habarlaımyz» dep málim etti Eńbek jáne halyqty áleýmettik qorǵaý mınıstrliginen.
2022 jylǵy 1 qarashadaǵy jaǵdaı boıynsha eldegi zeınetkerler sany – 2 mln 268 myń adam.
2022 jylǵy 1 qarashadaǵy jaǵdaı boıynsha zeınetaqy tólemderiniń ortasha mólsheri (bazalyq jáne yntymaqty zeınetaqy) 108 993 teńgeni qurady (BJZQ tólemderin esepke almaǵanda).
«Azamattardan feıkterge nazar aýdarmaýdy jáne aqparatty tek resmı derekkózden alýdy suraımyz. Esterińizge sala keteıik, jalǵan aqparat taratý zańmen jazalanady» dep eskertedi vedomstvodan.