Prezıdent Qasym-Jomart Toqaev Ulttyq quryltaıdyń negizgi otyrysynda Shyǵys Qazaqstan jáne Abaı oblystaryndaǵy Katonqaraǵaı, Marqakól jáne Maqanshy aýdandaryn qalpyna keltirý týraly sheshim qabyldaǵanyn málimdedi, dep habarlaıdy Almaty-akshamy.kz QazAqparatqa silteme jasap.
«Amanat» partıasy birqatar shekaralas aýdandy qalpyna keltirý týraly bastama kótergenin bilesizder. Úkimet meniń tapsyrmammen bul máseleni pysyqtady. Men soǵan sáıkes Qaton-Qaraǵaı, Marqakól jáne Maqanshy aýdandaryn qalpyna keltirý týraly negizgi sheshimdi qabyldadym. Árıne, buǵan arnaıy daıyndyq kerek. Qajetti esep-qısabyn jasap, qarajatymyzǵa, búdjettiń múmkindigine qaraýymyz kerek. Tıisti jumystyń bárin bıyl aıaqtap, aldaǵy eki jyldyń ishinde osy úsh aýdandy qalpyna keltire bastaımyz. Bul – ulttyq qaýipsizdikti qamtamasyz etý turǵysynan qarasaq ta, óte mańyzdy másele. Osy máseleni kópke sozbaı, sheshýimiz qajet. Jalpy, aýdandardy qosý nemese taratý ondaǵy jurttyń kúndelikti ómirine tikeleı áser etedi. Sheshim qabyldaǵan kezde halyq sany, ekonomıkalyq áleýeti, ınfraqurylymy túgel eskerilýge tıis», - degen Memleket basshysy óziniń aımaqtardy, onyń ishinde aýyldy órkendetý isine erekshe mán beretinin basa aıtty.
«Byltyr Prezıdent saılaýynan keıin eń aldymen aýyldy damytý máselesine arnalǵan Jarlyqqa qol qoıdym. Úkimet aldaǵy 5 jylda aýyldy damytýǵa aıryqsha kúsh salatyn bolady. Aýyl – qazaqtyń altyn besigi. Elge eńbegi sińgen kórnekti tulǵalardyń basym kópshiligi aýyldan shyqqan. Biz elimizdi órkendetemiz desek, aýyl mektebiniń jaı-kúıin jaqsartýdy myqtap qolǵa alýymyz kerek. Bul jumysty «Aýyl – el besigi» arnaıy jobasynyń aıasynda keshendi túrde júzege asyrý qajet. Iaǵnı, mektep salý, kúrdeli jóndeý júrgizý jáne ony jabdyqtaý jumysyn tıisti deńgeıde atqarý mańyzdy», - dedi Qasym-Jomart Toqaev.