2024 jyldyń 12 mamyrynan bastap Qazaqstanda alǵash ret ónerkásiptik kásiporyndardyń tehnologıalyq jabdyq satyp alýǵa jumsalǵan shyǵyndaryn óteý tetigi iske qosyldy. Óńdeý ónerkásibi salasyndaǵy kásiporyndar jumsaǵan qarajattarynyń 40 paıyzyna deıin qaıtaryp alýǵa múmkindik aldy, dep habarlaıdy aqshamnews.kz
«QazIndustry» Qazaqstandyq ındýstrıa jáne eksport ortalyǵy» AQ atalmysh qoldaý tetiginiń bir jyldaǵy nátıjesin jarıalady.
«Shyǵyndardy óteýdiń jańa tetigi iske qosylǵan sátten bastap bir jyl ishinde bizdiń ortalyq 1,1 mıllıard teńgege kásiporyndardyń tehnologıalyq jabdyq satyp alýǵa jumsaǵan shyǵyndarynyń bir bóligin ótedi», – dep habarlady «QazIndustry» AQ Bıznesti yntalandyrý dıreksıasy.
Kásiporyndar 3D-skanerler, 3D-prınterler jáne keń formatty prınterler sıaqty zamanaýı sıfrlyq sheshimdermen qosa, tehnologıalyq jabdyqty satyp alýǵa jumsaǵan shyǵyndarynyń 40%-yn (biraq 60 mıllıon teńgeden aspaıtyn) óteýge múmkindigi bar.
Jańa qoldaý sharasyn paıdalanǵan kásiporyndar qatarynda Almaty jeldetkish zaýyty, «Maıamı Solar», «ANNC Construction», «Mehlıtkom», «Barys E&T», «Temir SAK» jáne basqa da kompanıalar bar.
Mysaly, fıbrosementti qasbettik taqtalar óndirýge mamandanǵan ANNC Construction zaýytyna QazIndustry boıaý jelisin satyp alý shyǵyndarynyń bir bóligin ótedi. 44 mıllıon teńge kólemindegi ótemaqy kásiporynǵa óndiristi odan ári jańǵyrtýǵa jáne ónimniń ózindik qunyn edáýir tómendetýge múmkindik berdi.
«Ótemaqy alý úshin kásiporyn ótinimdi tapsyrmas buryn keminde bir jyl jumys istep, salyqtar men mindetti tólemder boıynsha qaryzy bolmaýy kerek. Sonymen qatar, sońǵy úsh jyldaǵy salyq tólemderiniń ósýin kórsetý qajet. Bul shart úsh jyldan az ýaqyt buryn tirkelgen kompanıalarǵa qatysty emes», – dep atap ótti «QazIndustry» AQ Bıznesti yntalandyrý dıreksıasynyń basshysy A.Saǵıev.
QazIndustry málimeti boıynsha, jańa memlekettik qoldaý sharasy kásiporyndar arasynda joǵary suranysqa ıe bola bastady. Qoldaý sharasy iske qosylǵan sátten beri ortalyqqa kásiporyndardan 340-tan astam ótinim túsken.
Esterińizge sala keteıik, memleket kásiporyndarǵa eńbek ónimdiligin arttyrý jáne ishki naryqta ónimdi ilgeriletýge baǵyttalǵan shyǵyndardyń bir bóligin óteıdi. Ótemaqy mólsheri 40%-tan 50%-ǵa deıingi mólsherdi quraıdy. Bul qoldaý sharalary tek bızneske ǵana emes, búkil el ekonomıkasyna da paıdaly: kompanıalardyń paıdasynyń ósýi salyq túsimderiniń artýyna yqpal etedi.
Memlekettik yntalandyrý sharalarynyń sharttarymen kelesi silteme arqyly tanysýǵa bolady https://qazindustry.gov.kz/ru/business_support jáne ár seısenbi, beısenbi kúnderi QazIndustry ǵımaratynda (Astana qalasy, Qabanbaı batyr dańǵyly, 17, E blogynda) ótetetin Ashyq esik kúnderine kelý arqyly bilýge bolady.
Anyqtama telefony: +7 (7172) 79 33 99 (ishki 444).