Bul bızneske zańsyz aralasý faktileri oryn alǵan jaǵdaıda asa mańyzdy
Almaty qalasy prokýratýrasy men Óńirlik kásipkerler palatasynyń bıznesti qorǵaý máseleleri jónindegi jumys kezdesýinde "Kásipkerlerdiń quqyǵyn qorǵaý jónindegi mobıldi top" jobasy tanystyryldy, dep habarlaıdy Almaty-akshamy.kz Inbusiness.kz-ke silteme jasap.
Osy jobanyń kómegimen kásipkerdiń quqyǵy buzylǵan jaǵdaıda, onyń ishinde kásipkerlik qyzmetke zańsyz aralasý faktileri oryn alsa, kásipker QR-kodty qoldaný arqyly Almaty prokýratýrasynyń bıznestiń quqyǵyn qorǵaý jónindegi mobıldi topqa júgine alady.
Jobany Medeý aýdany prokýrorynyń orynbasary Baýyrjan Tólendınov tanystyrdy.
Máselen, prokýratýra kásipkerlik sýbektileriniń barlyq obektine, mysaly, dúkender, bazarlar, dárihanalar, sulýlyq salondary, fıtnes ortalyqtary, keńseler jáne kásipkerlerdiń kez kelgen nysanyna, arnaıy QR-kodty beredi.
"Jobanyń jumysy bylaı, bıznes ıesi kásipkerlik qyzmetke zańsyz aralasý týraly habarlaý úshin QR-kodty skanerleıdi, budan ári zańsyz aralasý faktileri týraly qysqasha aqparatty baıandaıdy. Eger bar bolsa, fotosýretter men beınematerıaldardy qosa jiberedi. Ári qaraı prokýratýra aqparatty sıgnal boıynsha 30 mınýt ishinde baǵalaıdy jáne qajet bolǵan jaǵdaıda sıgnal túsken obektige baryp jedel áreket etedi", – dedi prokýratýra ókili.
Kásipkerlerden túsken barlyq habarlama qala prokýratýrasynyń derekqoryna túsedi jáne aýdandar boıynsha toptastyrylady. Keıinnen bul aqparat prokýratýra men kásipkerler palatasyna sıgnaldardy taldaýǵa jáne qalanyń júıelik problemalarynyń tizilimin qalyptastyrýǵa kómektesedi.
Kezdesý barysynda is-sharaǵa qatysýshylar "Kásipkerlerdiń quqyqtaryn qorǵaý jónindegi mobıldi top" jobasynyń jumysyna qatysty suraqtar qoıdy.
Almaty qalasy kásipkerler palatasynyń tóraǵasy Áýez Taıymbetov atalǵan jobadaǵy palata men prokýratýranyń birlesken jumysy týraly habarlady. Sondaı-aq Memleket basshysy shaǵyn bıznesti tekserý jónindegi moratorııdi 2024 jylǵa deıin uzartý týraly jarlyqqa qol qoıǵanyna qaramastan, memlekettik organdar tarapynan zańsyz tekserý júrgizý faktileri boıynsha kásipkerlerden ótinishter áli de kelip túsetinin eske saldy.
Jıynnyń ekinshi bólimi bıznes qoǵamdastyqtyń naqty máselelerin jáne olardy sheshý joldaryn talqylaý, qala prokýratýrasynyń aralasýyn talap etetin túıtkildi máselelerdi anyqtaýǵa baǵyttalǵan.
Prokýratýra men kásipkerler palatasynyń osy baǵyttaǵy birlesken jumysy týraly Almaty qalasy prokýratýrasynyń qoǵamdyq múddelerdi qorǵaý basqarmasynyń bastyǵy Danıar Ysqaqov pen Almaty qalasy kásipkerler palatasynyń bıznesti qorǵaý jónindegi sarapshysy Tımýr Zeıneshev qysqasha baıandama jasady.
"Bıznesti qorǵaý jelisi boıynsha 2022 jyly palataǵa kásipkerler tarapynan 462 ótinish tústi. Ótinishterdiń qurylymyn taldaý 2022 jyly bızneste suraqtar týyndaǵan negizgi máselelerdi anyqtaıdy. Atap aıtqanda, salyqtyq jáne kedendik ákimshilendirý – 11,9%, jer máseleleri – 24 5,2% jáne memlekettik organdardyń áreketterine shaǵymdar – 36 (7,8%). 2022 jyly ótinishterdiń kóp sany tótenshe jaǵdaı rejımin engizýmen baılanysty, shamamen 12,7%. Ótken jyly qala prokýratýrasymen birlesip, kásipkerlik sýbektilerin qylmystyq qýdalaýǵa negizsiz tartý anyqtaý boıynsha úlken jumys atqaryldy. Osylaısha, quqyq qorǵaý organdarynyń qyzmetinde qylmystyq qýdalaý jelisi boıynsha kásipkerlerdiń qyzmetine zańsyz aralasý bóliginde tekserýler júrgizildi. Nátıjesinde, 2022 jyly qala prokýratýrasy 21 qylmystyq isti óz betinshe toqtatty, 51 isti tergeý organynyń ózi toqtatty. Bul qylmystyq ister zańsyz tergeldi, kásipkerlerdiń quqyǵy óreskel buzyldy. Bul jumys turaqty negizde júrgiziledi", – dedi Tımýr Zeıneshev.