Memlekettiń qoldaýynsyz «qymbat» nesıemen bazardy jańǵyrtý qıyn
«Bıznesti qorǵaýdyń ekojúıesi» jobasy aıasynda Almaty kásipkerler palatasy ákimdikpen birlesip, «Tulpar», «Tastaq», «Juldyz», «Barys 4» bazarlary men «Kárim» bazarynyń ókilderi jáne jalǵa alýshylarymen kezdesý uıymdastyrdy, dep habarlaıdy Almaty-akshamy.kz QazAqparatqa silteme jasap.
Almaty qalasy Kásipkerler palatasynyń Almaly aýdandyq fılıalynyń dırektory Temirlan Madıevtyń aıtýynsha, atalǵan bazarlarda negizinen azyq-túlik pen turmystyq taýarlar satylady.
«Kásipkerler Dúısenov kóshesinen tómen Rozybakıev kóshesi jáne Tóle bı kóshesiniń boıyndaǵy zańsyz saýda máselesin sheshýdi suraıdy. Almaly aýdany ákimi apparatynyń qyzmetkeri osy jyldyń sońyna deıin Almaty qalasynyń aýmaǵynda saýda erejeleri bekitiletini týraly túsinikteme berdi. Qujat qabyldaǵannan keıin polısıa qyzmetkerleri stıhıalyq saýda nysandaryna ákimshilik sharalar qoldana alatyn bolady», – deıdi ol.
Kezdesý barysynda «Tıgrohaýd» JSHS-niń bas dırektory Janar Qurabaeva ámbebap saýda bazarlaryn jańǵyrtý máselesin kóterdi.
«Orta jáne shaǵyn bıznes úshin saýda oryndaryn saqtaý maqsatynda biz Ulttyq ekonomıka mınıstrligine bazarlardy jańǵyrtý baǵdarlamasy sheńberinde 2000 sharshy metrden astam saýda úıleriniń qurylys pýnktin ekonomıkanyń qoldaý kórsetiletin sýbsıdıalanatyn basym salalarynyń tizimine engizý týraly júgindik. Bizdiń dálelderimiz tyńdaldy jáne joǵaryda atalǵan tarmaq «DAMÝ» baǵdarlamasyna engizildi, alaıda 2021 jylǵy maýsymda atalǵan tarmaq joǵaryda kórsetilgen tizimnen alynyp tastaldy, osyǵan baılanysty bizge 18 jáne odan joǵary paıyzben óte qymbat nesıeler ǵana qoljetimdi», – dedi Janar Qurabaeva.
Spıkerdiń aıtýynsha, memleket qoldaýynsyz «qymbat» nesıemen bazardy jańǵyrtýdy júrgizý kásipkerlerge óte qıyn.
Naryq ókilderi naryqty jańǵyrtý máselesin «Damý» baǵdarlamasyna qoldaý kórsetiletin salalar tizimine engizýdi usynyp otyr.
Sondaı-aq, kásipkerler SHOB-ty qoldaý, atap aıtqanda, jeńildikpen nesıe berý, memlekettik baǵdarlamalar boıynsha qaıtarymsyz granttar máselelerine qyzyǵýshylyq tanytty. Sondaı-aq, Almaty kásipkerler palatasynyń qyzmetkerleri aldaǵy prezıdenttik saılaý boıynsha túsindirý jumystaryn júrgizip, azamattyq belsendilikti tanytýǵa shaqyrdy.
Kelesi kezdesý «Bereke» bazarynda ótetin boldy.