«e-Salyq Business» qosymshasy – kásipkerler úshin jańa mobıldi múmkindikter
Memlekettik kirister komıtetimen «e-Salyq Business» mobıldi qosymshasy ázirlenip, 2022 jyldyń 1 qańtarynan bastap iske qosyldy. Jańa sıfrlyq sheshim jeke kásipkerlerge salyq mindettemesin oryndaýdy jeńildetedi, ol, ásirese, jańadan tirkelgen kásipkerlerge yńǵaıly, dep habarlaıdy Almaty-akshamy.kz Qarjy mınıstrliginiń Memlekettik kirister komıtetine silteme jasap.
Salyq kodeksiniń aǵymdaǵy jyldan bastap qoldanysqa engizilgen erejelerine sáıkes, atalǵan qosymsha arnaýly mobıldi qosymshany paıdalanýmen nemese ońaılatylǵan deklarasıa negizinde arnaýly salyq rejımin qoldanatyn dara kásipkerlerdiń salyq mindettemeleri men áleýmettik tólemder boıynsha mindettemelerin oryndaýyn ońaılatýǵa arnalǵan.
Budan basqa, komıtet patent negizinde arnaýly salyq rejımin qoldanatyn kásipkerlerge arnalǵan qosymshanyń fýnksıonalyn pılottyq joba sheńberinde qoldaný múmkindigin kózdeıtin Qazaqstan Respýblıkasy Qarjy mınıstriniń buıryq jobasyn ázirledi.
Qazirgi ýaqytta buıryq jobasy usynystardy, onyń ishinde «Atameken» QR Ulttyq kásipkerler palatasynan alynǵan usynystardy, sondaı-aq jobaǵa sybaılas jemqorlyqqa qarsy saraptama júrgizý qorytyndylary boıynsha eskertýlerdi eskere otyryp pysyqtalady.
Qosymshanyń fýnksıonaly jeke kásipker retinde tirkelýge, salyq rejımin tańdaýǵa jáne ózgertýge, chekter berýge, kirister tizilimin qalyptastyrýǵa jáne salyq jáne áleýmettik tólemder boıynsha mindettemelerdi qosymshamen avtomatty túrde esepteý úshin qyzmetkerlerdiń kiristeriniń esebin júrgizýge jáne ońaılatylǵan deklarasıanyń tıisti joldaryn toltyrýǵa múmkindik beredi. Patent negizinde arnaýly salyq rejımin qoldanatyn kásipkerler «e-Salyq Business» mobıldi qosymshasynyń paıdalanýshylary bola otyryp, patent qunynyń esep-qısabyn usynýdan jáne tabys alǵanǵa deıin aldyn ala (avanspen) salyq jáne áleýmettik tólemderdi tóleýden bosatylady, - delingen aqparatta.
Qosymshamen eseptelgen jeke tabys jáne áleýmettik salyq somasyn Elektrondyq Úkimettiń tólem shlúzinde jarıalanǵan Halyq bankiniń servısimen ıntegrasıany paıdalana otyryp, tikeleı mobıldi qosymshada tóleýge bolady.
Budan basqa, kásipkerlerdiń yńǵaılylyǵy úshin qosymshada Salyq ámıanynyń servısteri (onyń ishinde bereshekti qaraý jáne óteý, artyq tólemdi basqarý boıynsha), memlekettik kirister organdarynyń birqatar habarlamalaryn alý, sondaı-aq, jeke kásipker qyzmetin ońaılatylǵan tártippen toqtatý servısi qoljetimdi. Qosymsha «Play Market», «App Store» jáne «App Gallery» alańdarynda qoljetimdi.
Qosymsha múmkindigine qaraı aǵymdaǵy jyly da fýnksıonalyn keńeıtý bóliginde, onyń ishinde ótken jyldyń sońynda Aqmola jáne Jambyl oblystarynda ótkizilgen pılottyq jobaǵa qatysqan kásipkerlerdiń usynystary boıynsha jetildiriletin bolady. Mysal retinde, aǵymdaǵy jyly jeke kásipker qyzmetkerlerimen eńbek sharttaryn esepke alý boıynsha Eńbek jáne halyqty áleýmettik qorǵaý mınıstrliginiń tıisti aqparattyq júıesimen eńbek sharttary boıynsha aqparat almasý boıynsha jumystar júrgizý josparlanǵan.