Qazaqstanda 1 shildeden bastap otbasyǵa qatysty jańa nysan paıda bolady, dep habarlaıdy aqshamnews.kz
Qazaqstanda 1 shildeden bastap elimizde otbasyǵa ornalasýdyń jańa túri – "Kásibı qabyldaýshy otbasy" engiziledi.
Oqý-aǵartý mınıstrligi bul ýaqytsha shara balalarǵa qaýipsiz ári jaıly úı jaǵdaıyn jasaýǵa baǵyttalǵanyn aıtty.
"Qabyldaýshy kásibı otbasylar bir ýaqytta tórt balaǵa deıin qabyldaı alady. Árbir balaǵa jeke kóńil bólinip, qamqorlyq kórsetiledi. Balanyń mundaı otbasynda bolý merzimi eń kóp degende alty aıdy quraıdy",- delingen aqparatta.
Qabyldaýshy kásibı otbasylarǵa tek tórt sanattaǵy balalar ǵana ornalastyrylady:
jetim balalar;
ata-anasynyń qamqorlyǵynsyz qalǵan balalar;
panasyz jáne qaraýsyz qalǵan balalar;
zorlyq-zombylyqtan zardap shekken balalar.
Vedomstvo aqparatynsha, qabyldaýshy kásibı otbasy bolýǵa úmitkerler mindetti túrde jetim balalarǵa arnalǵan arnaıy uıymdar men balalardy otbasyna ornalastyrýǵa kómektesetin akkredıttelgen mekemelerde psıhologıalyq daıyndyqtan ótedi.
Kandıdattardy taǵaıyndaý týraly sheshimdi qamqorshylyq organdary qabyldaıdy. Bul sheshim usynylǵan qujattardyń tolyqtyǵy men zań talaptaryna sáıkes qabyldanady.
Qabyldaýshy kásibı tárbıeshige ár bala úshin aı saıyn járdemaqy jáne kórsetken qyzmeti úshin qosymsha tólem qarastyrylǵan.
Aıta keteıik, elimizde balalardy ornalastyrýdyń tórt túri bar:
asyrap alý,
qamqorshylyq,
patronat,
qabyldaýshy otbasy.
Mınıstrlik balalar anyqtalǵan boıda ınternat mekemelerine emes, birden otbasylarǵa jiberiletindigin, bul olardyń otbasy jylýyn sezinýine múmkindik beretindigin aıtty.