Bıylǵy 2025 jyldy el prezıdenti Q.J.Toqaev «Jumysshy mamandyqtar jyly» dep jarıalaýy bizdiń salamyzdy odan ári jandandyryp, bolashaq avtokólik sheberlerin daıyndaý qyzmetimizge tyń serpin berýde. Jalpy, jumysshy mamandyqtaryna suranys óte joǵary bolǵanymen, keıde osy salanyń mamandary eleýsiz qalatyny da jasyryn emes. Prezıdentimiz qoldap turǵanda, kásibı bilimniń kókjıegin keńeıtip, jumysshy mamandyǵyn tańdaǵan jastarymyzdy básekege qabiletti, el ıgiligine qyzmet eter naǵyz maman etip shyǵarý bizdiń quzyrymyzda.
Men avtokólik salasynyń mamany retinde 2018 jyldan beri Almaty elektromehanıka kolejinde óndiristik oqytý sheberi, sheberhana meńgerýshisi, qazirgi tańda aǵa sheber qyzmetin atqaryp kelemin. Ustazdyq jolymda únemi izdenis ústinde júrip, aldyma kelgen shákirtterime zaman talabyna saı sapaly bilim berip, bolashaqta óz isiniń maıtalman mamany, básekege qabiletti kásip ıesi bolýyna bar kúshimdi, tájirıbemdi jumsaýdamyn. Bilim alýshylardy kolejishilik, qalalyq, respýblıkalyq birneshe kásibı baıqaýlarǵa qatystyryp, ózim de kásibı biligimdi shyńdaý maqsatynda qalalyq WorldSkills kásibı baıqýlarynda sarapshy qyzmetin atqaryp júrmin. Mundaı tájirıbeler mamandardy shyńdap, óz salasynyń qyry-syryn bile túsýine zor múmkindik beredi.
Osyndaı úlken tájirıbeniń biri áriptesterimmen birge 2023 jyly «Almaty qalasynyń bilim berý júıesin damytýdaǵy 2023-2030 jyldarǵa arnalǵan óńirlik jol kartasy» negizinde Germanıa elinde taǵylymdamadan ótkenim boldy. Germanıa – avtokólik óndirisi men ınjenerıa salasynda kóshbasshy elderdiń biri. Bul eldegi tehnıkalyq bilim berý júıesi teorıa men praktıkany ushtastyra otyryp, bolashaq mamandardyń joǵary deńgeıde daıarlanýyna basymdyq beredi.
Bul saparymyzda biz zamanaýı avtokólik tehnologıalary men qyzmet kórsetý standarttaryn meńgerip, shet eldik tájirıbeni zerttep, eýropalyq standartty Qazaqstandaǵy tehnıkalyq bilim berý júıesine engizýge múmkindik aldyq. Taǵylymdama barysynda jetekshi avtokólik kompanıalarynda tájirıbe jınaqtap, avtomobıl dıagnostıkasy, jóndeý jáne tehnıkalyq qyzmet kórsetý ádisteri boıynsha bilimimdi jetildirdim. Sheteldik sapardan oralǵan soń, qalalyq deńgeıde áriptesterimizge tájirıbemizdi bólisip, kolejde oqytý prosesine jańa ádister engizip, zamanaýı avtokólik sheberhanasyn jabdyqtaýǵa at salysýdamyz.
Germanıadaǵy is-tájirıbemdi áriptesterim Asgat Raıhan, Bulbul Mýnbaevamen birge «Tehnıkalyq jáne kásiptik bilim berý júıesindegi ınovasıalar: syn tegeýrinder men perspektıvalar» taqyrybyndaǵy
halyqaralyq pedagogıkalyq oqýlarda qorǵap shyǵyp, júldeli İ orynǵa ıe boldyq. Bul kolejimiz úshin de, ózimiz úshin de úlken jetistik dep sanaımyn. Aldaǵy ýaqytta da, zamanaýı bilimniń arqasynda maqsattarymyzǵa qol jetkizip, talaı shyńdardy baǵyndyratynymyzǵa senimdimin!