Onyń aıtýynsha, jalpy eksport qurylymynda shıkizattyq emes eksporttyń úlesi 35%-ǵa jetti. Máselen, byltyr jáne bıyldyń alǵashqy eki aıynda Qazaqstan qaıta óńdeý, mashına jasaý, hımıa ónerkásibi jáne tamaq ónerkásibi ónimderin belsendi eksporttady.
«2024 jyly eksporttyń eń joǵary ósimin metalýrgıa salasy kórsetti. Onyń kólemi 16,9 mlrd AQSH dollaryn qurady, bul qazaqstandyq metal ónimderiniń syrtqy naryqtaǵy joǵary básekege qabiletti ekenin kórsetedi. Sonymen qatar Qazaqstan azyq-túliktiń senimdi jetkizýshisi retinde, ásirese, kórshi elder, onyń ishinde Ózbekstan, Qyrǵyzstan, Aýǵanstan, Tájikstan elderi jáne Taıaý Shyǵys naryqtarynda óz pozısıasyn nyǵaıtýdy jalǵastyrýda. Tamaq ónimderiniń eksporty 2,8 mlrd AQSH dollaryn qurady. Mashına jasaý kórsetkishine keletin bolsaq, ol 2024 jyly 2,2 mlrd AQSH dollaryn qurady. Bul ónerkásiptiń tehnologıalyq qaıta baǵdarlanýynyń jáne kúrdeli jabdyqtar lokalızasıasynyń ósýi týraly jaqsy kórsetkish», – dedi spıker.
Sondaı-aq hımıa ónerkásibi men munaı-hımıa eksportynyń aıtarlyqtaı ósýi baıqalady, olardyń eksporty tıisinshe 1,9 jáne 1,5 mlrd AQSH dollardy qurady. Osylaısha, 2024 jyly shıkizattyq emes taýarlardyń eksporty Qazaqstanda ındýstrıalandyrý men qaıta óńdeýdi damytýdyń strategıalyq maqsattaryna sáıkes keletin óńdeý sektorlarynda turaqty ósýmen sıpattaldy. Elimizdiń shıkizattyq emes taýarlar eksportyndaǵy saýda seriktesteri arasynda Reseı Federasıasy, Qytaı Túrkıa, Ózbekstan, Qyrǵyzstan elderi bar. 2024 jyly Qazaqstan alǵash ret Mavrıtanıa, Laos, Iamaıka, Gabon jáne Zımbabvege óz taýarlaryn eksporttaı bastady.
Sondaı-aq QR elshilikteri janynan SIM-niń Túrkıa, Qytaı, Birikken Arab Ámirlikteri, Úndistan jáne Irandaǵy saýda ókilderi taǵaıyndaldy. Basty saýda seriktesteriniń biri bolyp tabylatyn Qytaı Halyq Respýblıkasynyń naryǵyna erekshe nazar aýdarylady. Osylaısha, QazTrade Úrimshi qalasynda ókildik ashty.
Spıker Qazaqstannyń aıtarlyqtaı logıstıkalyq múmkindikterin de atap ótti. SIM ındýstrıalyq jáne arnaıy ekonomıkalyq aımaqtar nysanynda transshekaralyq habtardy qurý jáne damytý boıynsha jumys júrgizýde: Jetisý oblysyndaǵy Qorǵas toraby, Mańǵystaý oblysyndaǵy Kaspıı toraby, Batys Qazaqstan oblysyndaǵy Eýrazıa, Túrkistan oblysyndaǵy «Ortalyq Azıa» Halyqaralyq ónerkásiptik kooperasıa ortalyǵy jáne Jambyl oblysyndaǵy «Alataý» Indýstrıalyq saýda-logıstıkalyq kesheni.
«Ónerkásiptik saıasat týraly» Zańǵa sáıkes SIM shıkizattyq emes eksportty damytý jáne ilgeriletý maqsatynda Ulttyq damý ınstıtýttarymen birlesip, shıkizattyq emes taýarlar men qyzmetterdi otandyq óndirýshilerge servıstik, qarjylyq jáne qarjylyq emes qoldaý sharalaryn usynady.