Almaty kólik jáne komýnıkasıalar kolejine – 95 jyl
Almaty kólik jáne komýnıkasıalar koleji sonaý Túrksib temirjoly salynǵan jyldardan beri elimiz úshin myńdaǵan temirjol mamandaryn daıarlap kele jatqan qara shańyraq, búginde sapaly bilim men suranysqa ıe kadrlardyń ordasy.
Ataýly dataǵa oraı kolejde erekshe mereıtoılyq is-shara uıymdastyrylyp, jańa «Kólik, komýnıkasıalar jáne logıstıka» óńirlik quzyrettilikter ortalyǵy men oqý ornynyń tarıhynan syr shertetin murajaıdyń tusaýy kesildi. Saltanatty jıyn Almaty qalasy ákimdigi men Almaty qalasy Bilim basqarmasynyń qoldaýymen ótti. Jıynǵa «Atameken» kásipkerler palatasy, áleýmettik seriktester men qalamyzdaǵy ózge de memlekettik kolejderdiń dırektorlary jáne BAQ ókilderi qatysty.
Maqsat – básekege qabiletti maman daıyndaý
Merekelik jıynda kolej dırektory Erbol Jarollauly Maǵazov quttyqtaý sóz sóılep, jańa ortalyqtyń mańyzdylyǵyn atap ótti:
– Kolejimizdiń 95 jyldyq mereıtoıy aıasynda quzyrettilik ortalyǵynyń ashylýy – biz úshin úlken jetistik. Bul ortalyq tek stýdentterge ǵana emes, oqytýshylar men sala mamandaryna da kásibı bilimin shyńdaýǵa jol ashady. Zamanaýı oqý jabdyqtarymen jabdyqtalǵan atalmysh ortalyqta qaıta daıarlaý, biliktilikti arttyrý jáne qysqa merzimdi kýrstar ótkizý josparlanǵan. Basty maqsatymyz – eńbek naryǵynyń suranysyna saı, básekege qabiletti mamandardy daıyndaý, – dedi kolej dırektory Erbol Jarollauly.
2021-2022 oqý jylynda «Jas maman» jobasy aıasynda quny 185 mıllıon teńge turatyn zamanaýı oqý qural-jabdyqtary – onyń ishinde TE33A teplovozynyń trenajer kabıneti ornatylyp, oqý úderisine engizildi. Bul – kolejdiń tehnıkalyq bazasynyń zamanaýı talaptarǵa saı ekenin kórsetedi.
Tarıhtan tábárik
Kolejdiń baı tarıhy men bolashaqqa jol silteıtin murasyn saqtaý maqsatynda arnaıy murajaı ashyldy. Munda oqý ornynyń ótkeni men jetistikteri, elge qyzmet etken túlekteri jaıly qundy derekter men jádigerler jınaqtalǵan. Bul – bolashaq mamandar úshin shabyt, tarıh úshin – qundy qazyna.
Kolejdiń 2014 jylǵy túlegi, qazirgi tańda jyljymaly quram bóliminiń meńgerýshisi Nurgúl Darhanqyzy jańa murajaıdy qonaqtarǵa erekshe yqylaspen tanystyryp, árbir jádigerdiń tarıhyn áserli jetkizdi: «Bilim ordasy jeti mamandyq boıynsha bilikti mamandar daıarlaıdy. 95 jyl ishinde oqý ordasyn 80 myńnan astam túlek támamdady. Olar elimizdiń túkpir-túkpirinde eńbek etip, Qazaqstan ekonomıkasynyń damýyna súbeli úles qosyp keledi. Bul murajaı – tek ótkenniń esteligi emes, bolashaqqa jol silteıtin taǵylymdy tarıh».
Sańlaqtar túlep ushqan orda
Almaty kólik jáne komýnıkasıalar koleji osy kúnge deıin 60 myńnan astam bilikti maman daıarlaǵan. Túlekteriniń arasynda elimizge belgili basshylar, sala ardagerleri men úzdik ınjenerler bar. Sonyń ishinde – Áset Muhanbetov, Aıdyn Satybaldın, Serik Ibragımov, Asem Shynybaeva, Baǵdáýlet Abyzbaev syndy mamandar búginde temirjol jáne bilim salasyndaǵy túrli qurylymdarda basshylyq qyzmet atqarýda.
Kolej dýaldy oqytý júıesin, kásiptik tájirıbe men bilimdi ushtastyrýǵa basymdyq beredi. Zamanaýı talaptarǵa saı oqytýshylar quramy men óndiristik sheberler birlese otyryp, bolashaq mamandardy tek bilimmen ǵana emes, ómirlik daǵdylarmen de qarýlandyryp otyr.
Almaty kólik jáne komýnıkasıalar koleji – ótkenniń ónegesin ulyqtap, bolashaqqa nyq qadam basqan bilim ordasy. 95 jyldyq tarıh – tek sandar ǵana emes, onda myńdaǵan taǵdyr, eńbek pen jetistik jatyr. Jańa ortalyqtar men bastamalar arqyly kolej aldaǵy ǵasyrdy da senimmen qarsy alatynyna kúmán joq.
Saltanatty jıynda kolej stýdentteri konserttik baǵdarlama ázirledi. Jas ónerpazdar án shyrqap, bı bılep, kolejdiń gımnin zor maqtanyshpen oryndady. Kesh qonaqtary kolej ujymyna Alǵys hattar tabystap, estelik syılyqtar men gúl shoqtaryn usyndy.
· Taqyrypqa oraı
Muhıt SMAǴULOV, óndiristik oqytý sheberi:
Zamanaýı basqarý qurylǵylary qoldanylady
Bizde temirjol ýchaskesiniń naqty maketi jasalǵan. Bul jerde stýdentter poıyz qabyldaý, jóneltý, baǵdarshamdar men baǵyttamalardy basqarý sıaqty jumystardy tolyqtaı oryndaıdy. Avtobuǵattaý, mıkroprosesorlyq júıeler sekildi zamanaýı basqarý qurylǵylary qoldanylady. Mundaı tolyqqandy maket Qazaqstanda tek bizdiń kolejde ǵana bar.
Leonıd BOIKO, arnaıy pánder oqytýshysy:
Arnaıy trenajer salany tolyq meńgerýge múmkindik beredi
Men – temirjolshy otbasynan shyqqan kolej túlegimin. Qazirgi zamanǵy elektrovozdar 25 myń vólttyq kerneýmen jumys isteıdi. Kolejdegi trenajer stýdentterge poıyzdy júrgizý, tejeý jáne qaýipsizdik sharalaryn tolyq meńgerýge múmkindik beredi. Oqý kezinde alǵashqy medısınalyq kómek kórsetý daǵdylary da úıretiledi.
Nurlan IBRAIYM, A-3-1 tobynyń 3-kýrs stýdenti:
Sapaly bilim men óndiristik tájirıbe úılesken
Men WorldSkills jarysynda «Avtomatshy» jáne «STV qurylǵylaryn jóndeý jáne montajdaý» baǵyty boıynsha birinshi oryn ıelendim. Álbette, bul – kolejde alǵan sapaly bilim men óndiristik tájirıbeniń nátıjesi. Nege deseńiz, munda kásibı bilikti ustazdardan úırenip, zamanaýı jabdyqtarmen jumys isteý múmkindigi bar. Óz mamandyǵymdy qıyn bolsa da qyzyq, bolashaǵy bar sala dep sanaımyn. Barlyq jaǵdaı jasalǵan bul oqý orny – shyn máninde bilikti maman bolýǵa jol ashatyn keremet múmkindik dep esepteımin.
Artem EMELÁNOV, T-3-1 tobynyń 3-kýrs stýdenti:
Dınamıkalyq platforma qozǵalysty tolyqtaı qaıtalaıdy
Bizdiń kolejdegi teplovoz kabınasynyń trenajeri – naǵyz lokomotıvtiń dál kóshirmesi. Munda mashınıst pen onyń kómekshisine arnalǵan oryndar, basqarý tetikteri – barlyǵy shynaıy. Bul trenajer dınamıkalyq platformada ornalasqan, ıaǵnı qozǵalysty tolyqtaı qaıtalaıdy. Qazaqstanda mundaı trenajer tek ekeý – bireýi Astanada, ekinshisi bizdiń kolejde. Bul – úlken múmkindik.