Ulttyq qaýipsizdik komıteti (UQK) habarlaýynsha Kárim Másimov 2024 jyldyń naýryz aıynda Qazaqstan Respýblıkasynyń Prezıdentine keshirim jasaý týraly ótinish jibergen, dep habarlaıdy almaty-akshamy.kz
UQK málimdeýinshe, Másimov qazirgi tańda Astanadaǵy UQK tergeý ızolátorynda qamaýda otyr. Komıtettiń resmı habarlamasynda:
"2024 jyldyń naýryz aıynda ol osy mekemeden Qazaqstan Respýblıkasy Prezıdentiniń atyna raqymshylyq alý jóninde ótinish joldaǵan," - delingen.
Kárim Másimovke qatysty qylmystyq ister 218-baptyń 3-bóliginiń 3-tarmaǵy («Qylmystyq jolmen alynǵan aqshany jáne ózge de múlikti zańdastyrý») jáne 366-baptyń 4-bóligi («Asa iri kólemde para alý») boıynsha sotqa deıingi tergeý jalǵasýda.
2023 jyldyń sáýir aıynda sot Ulttyq qaýipsizdik komıtetiniń burynǵy tóraǵasy Kárim Másimov pen onyń orynbasarlaryna qatysty úkim shyǵardy. Másimov memleketke opasyzdyq jasady, bılikti basyp alýdy nasıhattady jáne bılikti asyra paıdalandy dep tanyldy. Sot úkimi boıynsha Másimov múlki tárkilenip, 18 jylǵa bas bostandyǵynan aıyryldy jáne ómir boıyna memlekettik qyzmette laýazymdardy atqarý quqyǵynan aıyryldy.
Onyń orynbasarlary Sadyqulov 16 jylǵa, Erǵojın jáne Osıpov 15 jáne 3 jylǵa bas bostandyǵynan aıyryldy. Tórteýi de arnaıy ataqtary men memlekettik nagradalarynan aıyryldy. Memleketke 10 mıllıard teńge jáne 24 mıllıon dollar óndirildi.
Esterińizge sala keteıik, 2022 jyldyń 6 qańtarynda Kárim Másimov memleketke opasyzdyq jasady degen kúdikpen ustalǵan bolatyn. Qańtar aıynyń sońynda UQK baspasóz qyzmeti Másimov pen onyń orynbasarlarynyń isi qupıa bolyp, sot olardy qamaýǵa alýǵa sanksıa bergenin habarlady. 10 naýryzda Másimovten tárkilengen mıllıondar, záýlim úıler men qymbat kólikter týraly aqparat jarıalandy.