Túrkıaǵa kómek: qazaqstandyq eriktiler Kahramanmarash qalasyna 100 qazaq úı tigip jatyr. Olardyń 23-i – 12-16 qanatty saltanatty aǵash úı bolsa, qalǵany temirden jasalǵan.
Túrkıadaǵy jer silkinisine baılanysty Qazaqstannan barǵan eriktiler 100 qazaq úıdi qatty zardap shekken Kahramanmarash qalasyna tigip jatyr. Túrkıa bıligi ol úılerge baspanasyz qalǵan adamdardy ornalastyryp, jaqyndarynan aıyrylǵan jandarǵa psıhologıalyq kómek kórsetpek, dep habarlaıdy Almaty-akshamy.kz. Azattyq Ruhy-ke silteme jasap.
Alǵashqy otyz úıdi 14 erikti qazaq jigiti «Kilavuzlu mesire alani» ulttyq parkine tige bastady. Etnoaýyl retinde úıler tolyq tigilgen soń, Qazaqstan halqynyń atynan qamkóńil túrik aǵaıynǵa as beriledi. 30 qazaq úı tikeleı Túrkıa bıliginiń arnaıy ushaǵymen jetkizildi. Qazaq halqy jınaǵan qarjyǵa ártúrli sanattaǵy úıler satyp alyndy. Búkilálemdik etnosport qaýymdastyǵynyń ótinishimen Túrkıa bıligi shyǵarǵan arnaıy ushaq qalǵan úılerdi búgin Almatydan Ystambulǵa jetkizedi. Ary qaraı Adana qalasy arqyly kólikpen Kahrmanmarashqa keledi. Olardyń 23-i – 12-16 qanatty saltanatty aǵash úı bolsa, qalǵany temirden jasalǵan.
«Jalpy sany júzge jýyq kıiz úı tigiledi. Barlyǵynda qajetti kilem, ózge de jabdyqtary tolyq alynǵan, jetkilikti. Qalǵany – temirden jasalǵan súıekti úıler. Temirge beker tańdaýymyz túsken joq. Birinshiden, arzan. Ekinshiden, quralýy tez, 15 mınýtta 3-4 adam quraıdy, baılap otyrmaısyń. Úshinshiden, Armenıaǵa kıiz úı jibergende, ol jaqtaǵylar qazaqy úıdiń ne ekenin bilmegen jurt kıizin, ýyǵyn órtegen. Bul kóńilge de, júrekke de aýyr tıedi eken. Al temirmen ondaı nárse jasaı almaısyń. Osyndaı sebepterge baılanysty kıiz úıdiń temir súıektisin tańdadyq», - dedi qaıyrymdylyq is-sharasyn uıymdastyrýshy Nurbek Bekbaý.
Onyń aıtýynsha, Túrkıaǵa kıiz úımen birge jylytý peshteri de jetkizilip jatyr. Qazaq úıler palatkaǵa qaraǵanda jyly, keń ári kóńili muńdy, qaıǵyly jandar ózin baspanada turǵandaı sezine alady.
«Biz keshe kelip jettik. Synap kórý úshin ózimiz ishinde uıyqtadyq. Árıne, sýyqtaý. Biraq bizdiń júkpen birge arnaıy 61 dana jylytý qurylǵysy kele jatyr. Solar arqyly úıdi jylytamyz. Túrikterdiń ózderi de «palatkalar sýyq, jylynbaıdy» dep jazyp jatyr. Sonyń kesirinen adamdar aýyryp qalyp jatyr eken. Kıiz úı tigýge elimizden 14 adam keldi. Bári shetinen tańdap alyndy. Tımýr Sypataev sıaqty buryn áskerı salada qyzmet etken adamdar, sonyń ishinde ózin ómir boıy kıiz úı tigýge arnaǵan atamyz bar. Qysqasha aıtqanda, saıdyń tasyndaı iriktelgen adamdar keldi», - deıdi ol.
Bul bastamany kóptegen qazaqstandyqtar qoldady. Memleketten eshqandaı qarjy bólinbegen. Jetkizý jaǵyn tikeleı Túrkıa jaǵy moıyndaryna alǵan. Qazaq halqy 20 mln teńgeden astam qarajat jınady. 17 mln 300 myń teńgege 45 kıiz úı alynǵan. Keıin taǵy 2 mln 700 myń teńgege turmystyq zattar alyndy. Odan bólek, otandyq kásipkerler 50 kıiz úı satyp alyp, áýejaıdyń qoımasyna jetkizdi.
«Túrik eline kómekke keldim. Jasym 60-tan assa da, Almatyda tynysh otyra almadym. Kómegimizdi sońyna deıin beremiz. Qudaı mundaı aýyr jaǵdaıdy basqa bermesin. Qıraǵan úılerdi kórip júrek aýyrdy. Jylaǵan ana, egilgen áke, eńiregen bala. Óte qorqynyshty, qıyn, aýyr jaǵdaıdy kórdim. Bizdiń nıetimiz – túrkıalyq aǵaıynǵa demeý berý, baýyrmaldyǵymyzdy kórsetý, týysqan halyq ekendigimizdi bildirý», - Beregen Sypataev.
Qazaq úıler keıin osynda birjola qalady. Etnoaýylda aldaǵy kúnderi Kahramanmarash qalasynyń turǵyndaryna turaqty as beriledi. Zilzaladan zardap shekken áıelder men balalar qazirdiń ózinde tigilip jatqan qazaq úılerdi aınalshaqtap, qonystanatyn sátti kútip júr.
«Óte aýyr, aıtyp jetkizý qıyn tragedıa. Olar bizdiń úılerde turyp, qazaq eliniń jylýlyǵyn sezinsin, sharshaǵanyn bassyn, qaýipsiz ómir súrsin. Qazaq úı jer silkinisi kezinde qulamaıdy, qaýipsiz. Shańyraq pen ýyq sıaqty qazaq-túrik eli bir, birliktemiz. Tatýlyǵymyz turaqty. Osyndaı ıdeıalarymyzdy da aıtyp jatyrmyz. Olar bizge kómektesý arqyly úı tigýdi de úırenip jatyr», - dedi Almatydan kelgen erikti Jarqynbek Ahmetsakıuly.