Megapolıstegi Moll Aport East saýda ortalyǵynda «Meıirimdi qaqpaq» ekologıalyq aksıasyna belsene qatysqan jetkinshekter marapattaldy. İs-shara barysynda biregeı buıymdar qoıylǵan eko-jármeńke, qaldyqtardy qaıta óńdeý boıynsha sheberlik sabaqtary jáne ekologıalyq tájirıbeler týraly oqytý sesıalary ótti.
Iá, respýblıkalyq «Taza Qazaqstan» baǵdarlamasy aıasynda Almaty qalasynda plasıkalyq qaqpaqtardy jınaý boıynsha ekologıalyq aksıanyń birinshi maýsymy sátti aıaqtaldy.
Ekologıa máselelerine nazar aýdarýǵa jáne jas urpaqtyń ekologıalyq mádenıetin qalyptastyrýǵa baǵyttalǵan bul bastama mektep oqýshylaryn, balabaqsha baldyrǵandaryn jáne olardyń ata-analaryn bir arnaǵa toǵystyrdy.
— Nemerem qaqpaq jınap jatyrmyz degesin, otbasy músheleri túgel atsalystyq. Bul qaqpaqtardy iske asyryp, oıynshyqtar jasaıdy eken dep túsindirdi bizge. Balabaqshaǵa sóıtip úsh-tórt ret jınap berdik. Ózi de qyzyǵyp, ishkeli otyrǵan sýsynymyzdyń qaqpaqtaryn dereý ashyp alyp, jınap qoıatyn. Bul da balada jaýapkershilik sezimin qalyptastyrady dep oılaımyn. Mine, búgin qyzyqty is-sharaǵa nemeremmen birge men de keldim, — deıdi qaladaǵy 96-balabaqshanyń Adıa esimdi tárbıelenýshisiniń apasy.
Ortaq kúsh-jigerdiń arqasynda qatysýshylar 1,26 mln.-nan astam plasıkalyq qaqpaq jınady. Aksıanyń kóshbasshylary retinde qalanyń úsh aýdany tanyldy. Olar: Jetisý aýdany – 570 kg (jalpy kólemniń 22,7%-y); Almaly aýdany – 484 kg (19,3%); Áýezov aýdany – 328 kg (13,0%).
– Biz bul jobany qolǵa alǵanda, balalar osynshalyqty qyzyǵýshylyq týdyrady dep oılamadyq. Tipti, olar túrli tústi qaqpaqtardy ár jerden, turmystyq qaldyqtar arasynan da jınap alyp, bizge taza kúıinde ótkizip jatty. Bul da jaýapkershilikti sezingendik dep bilemin. Erekshe balalar eko-jattyqtyrýshylardyń jetekshiligimen qaıta óńdelgen osy qaqpaqtardan merekelik oıynshyqtar jasady. Bul buıymdardy iri kompanıalar satyp alyp, ekologıalyq bastamany qoldady. Qaqpaqtardy jınaý aksıasyna ún qosqan músinshi Talǵat Jumaǵul qaıta óńdelgen plasıkten biregeı jańa jyldyq shyrsha jasady. Bul óner týyndysy da ekologıalyq máselelerdi sheshýge degen úmittiń sımvolyna aınalyp, qalany Jańa jyl qarsańynda sándendirdi, — deıdi Eco Network jobasynyń negizin qalaýshy Evgenıı Muhamedjanov.
Iá, bul aksıa – jetkinshekterdiń qorshaǵan ortany qorǵaýǵa úndeıtin, elimizdegi ekologıalyq bastamalardy jetkizetin tamasha múmkindik.
— Biz bastaýysh synyp oqýshylaryna bólek, joǵary synyp oqýshylaryna bólek oryn daıyndap qoıdyq. Balalar qaqpaqtaryn sonda ákelip jınady. Eki jaq ta belsendi, qyzyǵa qatysty. Úılerinen ákeldi. Ózimizdiń asqanada ishken sýsyndarynyń qaqpaǵyn da osynda jınady. Tipti, kóshede aıaq astynda jatqan qaqpaqtardy da jýyp, tazalap ákelip ótkizdi. Balalarǵa aınalanyń tazalyǵyna atsalysyp júrýin, paıdalanylǵan zattarǵa da ekinshi ómir syılaýǵa, olardy da kádege jaratýǵa bolatynyn túsindirdik. Bizdiń eńbegimiz aqtaldy, alǵashqy úshtikke kirdik. Jalpy, biz balalarǵa qorshaǵan ortaǵa qamqorlyqpen qaraýdy kúnde aıtyp otyramyz. Mektebimizde túrli qaldyqtardy salatyn arnaıy bokstar ornatylǵan. Oǵan syrtyndaǵy jazýlaryna qaraı ár qaldyqty jeke-jeke salady. Bizde aınalasyna, ózin qorshaǵan ortaǵa beıjaı qaramaıtyn ulaǵatty balalar ósip keledi, — deıdi N143 mektep-lıseıi dırektorynyń tárbıe isi jónindegi orynbasary Darıǵa Joldybaeva.
«Taza Qazaqstan» baǵdarlamasy sheńberinde qolǵa alynǵan “Meıirimdi qaqpaq” aldaǵy ýaqytta da jalǵasyn tabady deıdi uıymdastyrýshylar.
— Biz 120 keli qaqpaq jınap, qala mektepteriniń arasynan 1-oryn aldyq. Balalar úılerinen ákeldi. Bul aksıa týraly týystaryn da habardar etti. Biz de, muǵalimder de atsalystyq. Tabıǵat úlken-kishi birigip qamqorlyq tanytqanda da ǵana taza bolatynyń nasıhattadyq dep oılaımyn, — deıdi N6 mektep-gımnazıa dırektorynyń tárbıe isi jónindegi orynbasary Roza Sáýlenbaıqyzy.
