Bir aı ishinde olar kúndelikti jáne oqý-jaýyngerlik qyzmet prosesinde jeke quramdy basqarýdyń negizderin ıgerýi kerek.
Shýchınsk qalasynda ornalasqan Shoqan Ýálıhanov atyndaǵy Qorǵanys mınıstrligi áskerı kolejiniń kadetteri Qurlyq áskerleriniń quramalary men bólimderinde áskerı tájirıbeden ótedi, dep habarlaıdy Almaty-akshamy.kz.
Oqý baǵdarlamasyna sáıkes, 2-kýrstyń 180-ge jýyq kýrsanty motoatqyshtar, tank jáne artılerıalyq bólimshelerde, sondaı-aq teńiz jaıaý áskeri quramasynda bólimshe komandıri laýazymdarynda áskerı taǵylymdamadan ótedi. Tájirıbe bólimshelerdi úılestirý kezeńinde uıymdastyrylyp otyr. Bul óz kezeginde bolashaq serjanttarǵa áskerlerdi daıarlaý jáne jaýyngerlik qoldaný erekshelikterimen tikeleı tanysýǵa múmkindik beredi.
Bir aı ishinde olar kúndelikti jáne oqý-jaýyngerlik qyzmet prosesinde jeke quramdy basqarýdyń negizderin ıgerýi kerek. Kýrsanttar taǵylymdama barysynda baǵynystylardy óz betinshe basqarýǵa, jaýyngerlik daıarlyq, qarý-jaraq pen áskerı tehnıkany paıdalaný boıynsha sabaqtar ótkizýge tájirıbe alady. Sondaı-aq kóshbasshylyq jáne komandırlik qabiletterin jetildiredi.
– Bul men úshin de, kýrstastarym úshin de oqý ornynda alǵan teorıalyq bilimimizdi tekserýge jáne tájirıbede qoldanýǵa tamasha múmkindik. Munda kazarmalar men polıgondarda jeke quramdy basqara otyryp, biz serjanttar jumysynyń qanshalyqty mańyzdy ekenin túsinemiz. Qazirdiń ózinde naǵyz komandır, sarbazdarǵa úlgi bolýǵa tyrysamyz, – dedi 4-shi mehanıkalandyrylǵan quramada taǵylymdamadan ótip jatqan kadet Rasýl Berdalıev.
Aıta ketý kerek, Shoqan Ýálıhanov atyndaǵy Qorǵanys mınıstrliginiń áskerı koleji kásibı serjanttar mektebi bolyp tabylady. Bul jerde Qurlyq áskerleriniń bólimsheleri úshin kishi komandırlerdi daıarlaý boıynsha bilim berý baǵdarlamalaryn iske asyrady. Jasóspirimder oqý ornyna orta bilim alǵannan keıin (orta mekteptiń 11 synyby) túse alady.
İrikteý medısınalyq kýálandyrý, kásiptik-psıhologıalyq testileý jáne dene shynyqtyrý daıarlyǵy boıynsha normatıvterdi tapsyrý jolymen atestattyń ortasha baly eskerile otyryp júrgiziledi. Áskerı kolejdi bitirgennen keıin túlekter "serjant" áskerı ataǵyn, "áskerı istegi kishi býyn menedjmenti" mamandyǵyn, synyptyq biliktiligin alady jáne kelisimshart boıynsha áskerı qyzmet ótkerý úshin Qarýly Kúshterge jiberiledi.