Qoıylym avtory - aqyn Baqyt Bedelhan
Ǵ. Músirepov atyndaǵy Qazaq memlekettik akademıalyq balalar men jasóspirimder teatrynda aqyn, Qazaqstan Jazýshylar odaǵy tóraǵasynyń orynbasary Baqyt Bedelhannyń “9 gram” ıntellektýaldy poetıkalyq dramasynyń tusaýkeseri ótti, dep habarlaıdy Almaty-akshamy.kz Almaty.tv-ge silteme jasap.
Týyndynyń rejıseri Juldyzbek Jumataı jáne dybyspen kórkemdegen sazger Qanat Ibragımov. Poetıkalyq dramany Qarasaı aýdanynyń “Qarasaı jastary” teatry sahnalady.
“9 gram” - oqqa baılanǵan Alash arystarynyń rýhyna arnalǵan tyń týyndy kórermen kóńilinen shyqty.
"Kórkemdik shyndyq sahnada saltanat qurǵanda oılandyrmaı, toǵandyrmaı qoımaıdy. Qazir eldiń rýhyn kórsetip, teatrdyń deńgeıin kórsetý úshin dramatýrgıalyq til kerek. Ol qandaı til? Ol Shekspırdiń tili – aq óleń. Sahanada qazaqtyń qasıetti qara óleńi men aq óleń saltanat qurýy kerek. Sol kezde eldiń nazary aýady, kóńili burylady. Buǵan deıin tórt aýdanda qoıylymdy kórermen nazaryna usyndyq. Osyndaı daıyndyqtan ótken teatr ujymy almatylyqtardyń aldynda óner kórsetti", - dedi qoıylym avtory, aqyn Baqyt Bedelhan.
Premerada Qazaqstannyń Eńbek eri, Qazaqstan teatrlar asosıasıasynyń prezıdenti, kıno jáne teatr akteri, profesor Asanáli Áshimov “Qarasaı jastary” teatryna sáttilik tilep, aq batasyn berdi.
Al aýdandyq halyq teatryna qoldaý kórsetip júrgen aqyn Baqyt Bedelhan Almaty qalasy ákimdigine alǵysyn bildirdi.