Memlekettik keńes saılaýdy 2023 jylǵa qaldyrýǵa shaqyryp otyr
Jeltoqsan aıynda ótetin prezıdent saılaýyna eldiń burynǵy basshysy Mýamar Kaddafıdiń ekinshi uly Seıf ál-Islam Kaddafı qatysýǵa nıet bildirip otyr. Ol úmitker retinde qujatyn tirkeýge ótkizip qoıǵan, dep habarlaıdy Almaty-akshamy.kz.
Al-Marsad basylymynyń málimetinshe, Seıf ál-Islam Sebha qalasyndaǵy óńirlik saılaý komısıasyna prezıdenttikke úmitker retinde qujatyn tapsyrǵan. Lıvıa eliniń burynǵy basshysynyń uly qujat tapsyrý kezinde onyń qasynda advokaty Haled az-Zaıdı de bolǵan.
Lıvıadaǵy parlament jáne prezıdent saılaýy osy jyldyń 24 jeltoqsanynda ótý kerek, alaıda ol úshin tıisti zań qabyldaný qajet. Memlekettik keńes parlament usynǵan zań normasyn maquldamady. Óıtkeni ol feldmarshal Halıf Haftardy úmitker retinde usynýǵa múmkindik beredi. Ol Lıvıa prezıdenti saılaýyna túsý úshin 22 qyrkúıekte Lıvıa ulttyq áskeri bas qolbasshysy laýazymynan úsh aıǵa ketken bolatyn. Memlekettik keńes saılaýdy 2023 jylǵa qaldyrýǵa shaqyryp otyr.
Mýammar Kaddafıdiń rejımi qulaǵan soń Lıvıa batysyndaǵy Trıpolıde halyqaralyq moıyndalǵan Ulttyq kelisim úkimeti jumys istep jatyr. Al, eldiń shyǵysyn Halıf Haftar basshylyǵymen Lıvıa ulttyq áskeri basqaryp otyr.
Aıta ketsek, Lıvıadaǵy prezıdent saılaýy 2019 jyly ótý kerek bolǵan. Alaıda Halıf Haftardyń Trıpolıge jasaǵan shabýylynan soń belgili bir ýaqytqa keıinge shegerilgen. Lıvıa saıası dıalog forýmynda prezıdent saılaýyn ótkizetin kún atalǵan edi.