Qazirgi ýaqytta QR ekologıa, geologıa jáne tabıǵı resýrstar, ındýstrıa jáne ınfraqurylymdyq damý mınıstrlikteri kabel-sym ónimderine ýtılızasıalyq alym alý merzimin 2023 jylǵy 1 qańtarǵa deıin shegerý boıynsha jumys júrgizýde, dep habarlaıdy Almaty-akshamy.kz Úkimettiń baspasóz qyzmetine silteme jasap.
Bul týraly QR Ekologıa, geologıa jáne tabıǵı resýrstar mınıstri Serikqalı Brekeshev habarlady. Memleket basshysy Q. Toqaevtyń ýtılızasıalyq alym alýmen memlekettik uıym aınalysýy tıis degen tapsyrmasyn oryndaý úshin Úkimet tıisti qaýly qabyldady. Osy qaýlymen «ÓKM Operatory» JSHS-nyń jarǵylyq kapıtalyna júz paıyz qatysý úlesi memleket menshigine qabyldanǵany aıqyndaldy. Mınıstr habarlaǵandaı, óndirýshilerdiń (ımporttaýshylardyń) keńeıtilgen mindettemeleriniń jańa operatory retinde memlekettiń 100% qatysýymen «Jasyl Damý» AQ anyqtaldy. Jarǵylyq kapıtalda AQ-nyń basqa menshik ıeleri joq. Ýtılızasıalyq alym mólsherlemelerin qaıta qaraý úshin Vedomstvoaralyq jumys toby quryldy, oǵan jurtshylyq, bıznes jáne múddeli memlekettik organdardyń ókilderi kirdi.
«27 qańtarda kabel-sym ónimderine ýtılızasıalyq alym mólsherlemelerin (koefısıentterin) qaıta qaraý máselesi talqylandy. Jumys tobynyń músheleri qazirgi ýaqytta QR ekologıa, geologıa jáne tabıǵı resýrstar, ındýstrıa jáne ınfraqurylymdyq damý mınıstrlikteri kabel-sym ónimderine ýtılızasıalyq alym alý merzimin 2023 jylǵy 1 qańtarǵa deıin shegerý boıynsha jumys júrgizip jatqanyn habarlady», – dedi S.Brekeshev.
Bul sheshim kabel-sym ónimderin ımporttaýshylarmen jáne óndirýshilermen talqylaý kezinde qabyldandy. «Atameken» UKP qorytyndysynda ýtılızasıalyq tólemdi yntalandyrý erejeleri men esepteý ádistemesine túzetýler usynyldy. Ekologıa mınıstrligi tıisti buıryq jobasyn ázirledi, ol memlekettik organdarmen kelisilý satysynda.