Almatyǵa gastróldik saparmen Ǵ.Jubanova atyndaǵy Aqtóbe oblystyq fılarmonıasynyń Qazaq kameralyq hor ujymy keldi. Dástúrli ónerdiń qarashańyraǵynda KSRO Halyq artısi, Qazaq KSR Memlekettik syılyǵynyń laýreaty, kompozıtor, profesor Ǵazıza Jubanovanyń 95 jyldyǵyna arnalǵan «Jyr jazamyn júregimnen» atty konsert uıymdastyryldy.
Merekelik sharada Abaı atyndaǵy Qazaq ulttyq opera jáne balet teatrynyń jetekshi solısi (jeke oryndaýshysy), «Qurmet» ordeniniń ıegeri Zarına Altynbaeva, QR Mádenıet salasynyń úzdigi Shárigúl Ótegenova, sondaı-aq Órken Saǵıev, Gúljan Jubanysheva jáne Serik Jubatqan óner kórsetti.
Baǵdarlama barysynda Ahmet Jubanovtyń «Qarlyǵash», «Aq Sholpan», halyq áni «Samal taý», Táńirbergen Moldabaıdyń áni «Moldabaı», orys halyq áni «Ah, Samara gorodok», ázerbaıjan halyq áni «Ná baxirsan», t.b. qazaq, orys jáne shetel kompozıtorlarynyń ánderi oryndaldy.
«Qurmanǵazy atyndaǵy Qazaq ulttyq konservatorıasynda drıjer mamandyǵynyń 14-shi stýdenttik pándik olımpıadasy Ǵ.Jubanovanyń 95 jyldyq mereıtoıyna arnalǵan. Bizdiń kelip otyrǵan jaıymyzdyń mánisi de osynda. Konsertimizdiń taqyrybyn Ǵazıza Ahmetovanyń «Jyr jazamyn júregimnen» shyǵarmasynyń ataýymen qoıdyq. Sonymen qatar, birinshi ret osy áýenniń tusaýyn kestik. Almatynyń kórermenderi erke, talǵamy joǵary jandar ǵoı, olardyń kóńilinen shyǵa bilý de biz úshin birshama qıyn- dyq týdyrdy. Alaıda, kóp jyldyq tájirıbemizdiń arqa- synda kórermenge tamasha kóńil kúı syıladyq degen senim- demiz. Osy rette gastróldik saparymyzdy uıymdastyryp, bizge qoldaý bildirip otyrǵan oblys basshylyǵyna erekshe alǵysymyzdy bildiremiz», – deıdi Ǵ.Jubanova atyndaǵy Aqtóbe oblystyq fılarmonıasynyń Qazaq kameralyq hor ujymynyń kórkemdik jetekshisi ári dırıjeri Merbol Quspanov.
Ǵ.Jubanova atyndaǵy oblystyq fılarmonıasy – jańa standartqa saı, mádenı sharalardy joǵary deńgeıde ótkizip kele jatqan óner ordasy. 74 jyldyq tarıhy bar biregeı ujymnyń jekeleı solıseri kóptegen halyqaralyq jáne respýblıkalyq baıqaýlar men festıválderdiń laýreattary atanǵan.
«Óner súıer qaýymdy tamsandyrý maqsatynda dástúrli ánderimizdi, sheteldiń áýenin, Batys Qazaqstan óńirinen shyqqan kompozıtorlardyń týyndylaryn jańasha leppen oryndap shyqtyq. Kórmenderdi tańqaldyra aldyq degen úmittemiz. Bizdiń hor Táýelsizdiktiń qurdasy. Alǵash osy ujym boı kótergeli beri eńbektenip kele jatyrmyn. Qarap otyrsam, óner áleminde órkendep kele jatqanymyzǵa 31 jyldaı bolypty. Osy ýaqytqa deıin bizge qoldaý bildirip kele jatqan kórermenderimizge, Mádenıet basqarmasyna alǵysymyzdy bildiremiz», – deıdi QR mádenıet salasynyń úzdigi Baqtygúl Tólegenqyzy.
Búginde hor repertýarynda 600-den astam týyndy bar. Halyq ánderi, qazaqstandyq jáne sheteldik kompozıtorlardyń kameralyq shyǵarmalarymen qatar, ártister V.A.Mosarttyń «Rekvıem», K.Orftyń «Karmına Býrana», G.Svırıdovtyń «Pýshkınskıı venok jáne Neızrechennoe chýdo», M.Saǵatovtyń «Merekelik kantata» jáne taǵy basqa hor klasıkasynyń kólemdi shyǵarmalaryn oryndaıdy. Talǵamy bıik, tájirıbesi mol oryndaýshylar zalǵa jınalǵan kórermenderdiń qulaq quryshyn qandyryp, rızashylyǵyna bólendi.
Ónerin usyna kelgen Ǵ.Jubanova atyndaǵy Aqtóbe oblystyq fılarmonıasynyń Qazaq kameralyq hor ujymy men ujymnyń kórkemdik jetekshisi ári dırıjeri Merbol Quspanovqa konservatorıa rektory Arman Júdebaevtyń atynan Alǵys hat tabystaldy.