Bul máseleni senator Álı Bektaev kóterdi.
Senator Premer-Mınıstrge joldaǵan depýtattyq saýalynda jylyjaı sharýashylyǵymen aınalysatyn fermerler komýnaldyq tarıfterdiń qymbattyǵyna, otynmen qamtamasyz etýdegi úzilisterge jáne memlekettik qoldaý deńgeıiniń tómendigine tap bolǵany týraly aıtty, dep habarlaıdy Almaty-akshamy.kz Egemen.kz-ke silteme jasap.
«Búgingi tańda respýblıkamyzda barlyǵy 1 265 gektar jylyjaılardyń 844 gektary Túrkistan oblysynda ornalasqan. Olarda jyl saıyn 91 myń tonna kókónis óndiriledi, bul el turǵyndaryn qamtamasyz etip otyr. Jylyjaılarda barlyǵy 12 myńnan astam sharýa qojalyqtary jumys isteıdi. Túrkistan oblysynda óndiriletin ónimniń 66%-y Saryaǵash aýdanynda ósedi. Ol aýdannyń jalpy ishki óniminiń 30%-yn quraıdy. Búginde jylyjaı óndirisi óńir aýyl sharýashylyǵynyń negizin quraıtyn, halyqty sapaly kókónispen qamtamasyz etip otyrǵan, syrttan keletin ımporttyq ónimderge tótep bere alatyn salaǵa aınalyp kele jatyr. Sondyqtan bul salany qoldaý elimizdiń ishki naryǵyn jáne azyq-túlik qaýipsizdigin qoldaý bolyp esepteledi», - dedi senator Álı Bektaev.
Depýtat bul salanyń damýyna teris áser etetin negizgi faktor – komýnaldyq qyzmetterdiń joǵary quny ekenin atap ótti. Sonymen qatar, qysqy jaǵdaıda jylyjaı sharýashylyqtarynyń áleýmettik mańyzdylyǵyn eskere otyryp, olarǵa da qosymsha kómir bólý qajet.
Senator qazirgi tańda jylyjaı óndirisiniń baǵasyna, sapasyna jáne kólemine is júzinde áser etpeıtin jylyjaı óndirisin memlekettik qoldaýdy kúsheıtý qajettigi týraly da aıtty.
«Ásirese, ózderi uryq shyǵaryp, kóshet ósirip, olardy egip, ónim alyp jatqan jylyjaılardy memlekettik qoldaý óte mańyzdy. Sondyqtan tuqymǵa, kóshetke, komýnaldyq shyǵyndardy tómendetýge arnalǵan qosymsha qarjy tetikteri qaralý kerek. Jylyjaımen aınalysatyn taýar óndirýshilerdi jeńildetilgen nesıelermen qamtamasyz etý de asa mańyzdy. Jylyjaı óndirisin qoldaý jáne damytýǵa qatysty problemalardy Úkimet deńgeıinde arnaıy qarap, keshendi sheshimder qabyldaý qajet dep esepteımiz», - dedi Álı Bektaev.