QR Sıfrlyq damý, ınovasıalar jáne aeroǵarysh ónerkásibi mınıstrligi 5G jelisin iske qosý jaıyndaǵy josparlarymen bólisti, dep habarlaıdy Almaty-akshamy.kz Inform.kz-ke silteme jasap.
«Mınıstrlik Qazaqstan Respýblıkasy aýmaqtyq prınsıp negizinde radıojıilik spektr (budan ári – RJS) taratý bóliginde 5G jelisin engizý strategıasyn ázirledi. Úzdiksiz 100 MGs jolaǵyn bólý múmkindigi bar 3,6 – 3,9 GGs dıapazonyndaǵy jıilikter belgilendi. Sondaı-aq, Qazaqstanda 5G tehnologıasyn engizý jáne iske asyrý merzimderi belgilengen», - dep jaýap berdi vedomstvo redaksıa saýalyna.
Usynylǵan málimetke sáıkes, búginde baılanys operatorlary kelesi jumystardy atqardy: «Qazaqtelekom» AQ Nur-Sultan qalasynda «Astana Hub» IT startaptar halyqaralyq tehnoparki» aýmaǵynda pılottyq 5G jelisin iske qosty. Shymkent qalasynda bazalyq stansıany ornatý orny anyqtaldy («Shymkent Plaza» SO), 5G tehnologıasynyń synaqtary tehnıkalyq engizý satysynda. «Mobaıl Telekom-Servıs» JSHS pılottyq 5G jelisin Almaty qalasyndaǵy úsh jerde iske qosqan. Olar – «Qaısar Plaza» saýda-keńse ortalyǵy (Jeltoqsan k-ci, 115), Panfılov kóshesi (Abaı atyndaǵy MAOBT-tan Tóle bı kóshesine deıin) jáne «Medeý» bıik taýly sport kesheni. «Ksell» AQ Almaty qalasynyń Arbat aýdanynda (Nursultan Nazarbaev pen Jibek joly dańǵyldarynyń qıylysy) 5G tehnologıasyn testileýdi iske qosty. «Kar-Tel» JSHS Almaty qalasynda NARXOZ University (Jandosov k-si, 55) jáne «Grand Alataý» bıznes ortalyǵy (Tımırázev k-si, 28V) aýdandarynda 5G tehnologıasyn testilik rejımnen ótkize bastaǵan.
«Qazaqstanda 5G jelisin 2022 jyldyń sońyna qaraı respýblıkalyq mańyzy bar qalalar – Nur-Sultan, Almaty, Shymkentte, al 2023-2025 jyldary oblys ortalyqtarynda iske qosý josparlanyp otyr», - dep tolyqtyrdy vedomstvodan.