Bul san áli de ósip jatyr.
Ateroskleroz problemasy jaıynda Qazaqstan kardıologıalyq qoǵamy basqarmasynyń tóraıymy Sáýle Ábseıitova arnaıy ótken baspasóz máslıhaty barysynda aıtty, dep habarlaıdy Almaty-akshamy.kz Baq.kz silteme jasap.
Mamannyń aıtýynsha, holesterın deńgeıiniń kóbeıýi organızmge óte qaýipti.
«Holesterın deńgeıin salaýatty ómir saltyn ustaný jáne durys tamaqtaný arqyly tómendetýge bolmaıdy. Kóptegen naýqastar úshin bul jetkiliksiz. Árbir naqty naýqasqa profılaktıka nemese emdeý boıynsha qajetti usynymdar men preparattardy onyń ilespe aýrýlary men jalpy jaı-kúıin eskere otyryp, dáriger ǵana tańdaı alady», - dep naqtylap ótti dáriger.
Aıtýynsha, DDSU barlyq elderdi ateroskleroz problemasyna nazar aýdarýǵa jáne onyń aldyn alý máselelerin densaýlyq saqtaý júıesi saıasatynyń negizgi basymdyǵy retinde qoıýǵa birneshe jyldan beri shaqyryp keledi.
Al, statısıka derekterine súıensek, 2020 jyly elimizde qan aınalym júıesi aýrýlarynan bolatyn ólim-jitim 100 myń turǵynǵa shaqqanda 193,79 adamdy quraǵan. Basqasha aıtqanda, aterosklerozdan respýblıkada bir jylda 36 myńnan astam adam qaıtys bolady. Bul san áli de ósip jatyr.
Alaıda aterosklerozdan bolatyn ólim-jitim men asqynýdy edáýir tómendetýge bolady. DDSU sarapshylarynyń pikirinshe, júrek-qantamyrlar aýrýlary asqynýlarynyń 85%-yn salaýatty ómir saltyn ustaný, ýaqtyly tekserilý jáne qaýip faktorlaryn anyqtaý, aýrýdyń erte aldyn alý jáne emdeý, qandaǵy «jaman» holesterın deńgeıin tómendetý arqyly boldyrmaýǵa bolady
«40 jastan asqan adamdar eki jylda bir ret júrek-qantamyrlary aýrýlaryna tekserýden ótýi kerek. Ol emhanalarda tegin júrgiziledi. Bul sizdi eshteńe mazalamasa da mańyzdy. Sebebi mundaı skrınıng, tipti dıagnoz bolmasa da, aldaǵy 10 jyl ishinde aýrýdyń paıda bolý qaýpin anyqtaýǵa kómektesedi. Eger holesterın joǵary bolsa, onda sizge profılaktıkalyq em taǵaıyndalady», - dedi Sáýle Ábseıitova.