Sondaı-aq, jylda 19 myńnan astam adam jol-kólik oqıǵalary kezinde jaraqat alady
Astana Hub-ta QR İshki ister mınıstrligi men Sergek Group kompanıasy uıymdastyrǵan «Jol qaýipsizdigi salasyndaǵy sıfrlandyrý jáne jańa tehnologıalar» forýmy ótti, dep habarlaıdy Almaty-akshamy.kz Azattyq Ruhy-na silteme jasap.
Oǵan İshki ister mınıstriniń orynbasarlary Igor Lepeha men Sáken Sársenov, SDIAÓM ókilderi, İİM Ákimshilik polısıa jáne aqparattandyrý qyzmetteriniń basshylyǵy, sondaı-aq kólik salasynyń uıymdary men kásiporyndary, IT-kompanıalar jáne tehnıkalyq IT-jobalardyń avtorlary qatysty.
Forýmnyń ashylýynda ishki ister mınıstriniń qyzmet jónindegi orynbasary Igor Lepeha atap ótkendeı, jol qozǵalysy qaýipsizdigin qamtamasyz etý jáne ony tıimdi uıymdastyrý – qazaqstandyqtardyń ál-aýqatynyń, olardyń ómiriniń jaılylyǵy men qaýipsizdiginiń mindetti sharty.
«Jol qaýipsizdigi máseleleri óte ózekti jáne jurtshylyqtyń nazarynda. Bul jaǵdaı el basshylyǵyn alańdatady. Jyl saıyn joldarda 2,5 myńǵa jýyq azamatymyz qaza taýyp, 19 myńnan astam adam jaraqat alady. Alaıda, qazir polısıanyń jumysy onyń saldaryn joıýǵa ǵana baǵyttalǵan. Qoldanystaǵy tásilder men sheshimder endi jetkiliksiz. Kólik júrgizý mádenıetin arttyrýda jáne joldardaǵy buzýshylyqtardy anyqtaýda sıfrlyq tehnologıalardy qoldaný óte mańyzdy», - dedi I. Lepeha.