Komandır aýǵan soǵysynda arnaıy tapsyrmalardy oryndaıtyn batalóndy basqarǵan
Almatyda dańqty qolbasshy, qazaqtyń ańyz adamy Borıs Kerimbaevty eske alýǵa arnalǵan respýblıkalyq ǵylymı konferensıa ótti, dep habarlaıdy Almaty-akshamy.kz Almaty.tv-ge silteme jasap.
İs-sharada jaýyngerdiń erligi men aýǵan soǵysy jyldaryndaǵy estelikter aıtyldy. Sovet Armıasynyń komandıri 1980-1983 jyldary Aýǵan soǵysyna qatysyp, arnaıy tapsyrmalardy oryndaıtyn batalóndy basqarǵan. Saýatty basshylyǵynyń arqasynda onyń sarbazdary az shyǵynǵa ushyrap, shaıqastyń basym kópshiliginde jeńiske jetip otyrǵan. Onyń erligi ańyzǵa aınalyp, «Qara maıor» degen laqap aty tarıh betinde saqtaldy. Eske salaıyq, Borıs Kerimbaev 2019 jyly 71 jasqa qaraǵan shaǵynda ómirden ótken edi.
– Borıs Tókenuly komandır, basshy bolyp otyryp, qıyn kezde sarbazdardyń elge aman kelýine qolbasshy retinde óziniń sińirgen eńbegi bar. Elimizdiń Qarýly Kúshterin sarbazdarmen toltyrmaıtyn bolsaq, qazirgi jasap jatqan jumystyń bári beker bolýy múmkin. Sol sebepti Qarýly Kúshteriniń qataryna jastardy kóptep tartýymyz kerek, – dedi «Aýǵan soǵysy múgedekteri men ardagerleri odaǵy» ZTB respýblıkalyq uıymy ortalyq keńesiniń tóraǵasy Marat Qoılybaev.