2024 jyly Qazaqstan Respýblıkasy Qorǵanys mınıstrligi Armıa ortalyq sport klýbynyń sportshylary álemdik arenada jarqyn jetistikterin kórsetti.
Olar barlyǵy 463 medal oljalady. 203 altyn, 120 kúmis jáne 140 qola, dep habarlaıdy aqshamnews.kz Qorǵanys mınıstrligine silteme jasap. Bıylǵy jyly QR QM AOSK sportshylary boks, dzúdo, kúres, atys, gımnastıka, zamanaýı bessaıys jáne basqa da sporttyń 10 túrinen Qazaqstannyń atynan Parıjdegi Olımpıada oıyndaryna 21 lısenzıa jeńip aldy.
Parıjde ótken jazǵy Olımpıada oıyndarynda Qazaqstan quramasy alǵan jeti medaldyń tórteýin armıa sportshylarynyń enshisinde. Álem chempıonattarynda 49 medal, Azıa chempıonattarynda 32 medal, Qazaqstan chempıonattarynda 245 medal jáne halyqaralyq týrnırlerde 133 medal jeńip aldy.
Armıa sportshylary halyqaralyq áskerı sport keńesiniń (CISM) qoldaýymen jáne TMD sheńberinde 20-dan astam mańyzdy sporttyq is-sharalarǵa qatysty. Olardyń qatarynda Qytaıdaǵy 7-shi Azıalyq CISM otyrysy, dzúdo, kúres, thekvondo jáne voleıboldan CISM álem chempıonattary, sondaı-aq Reseıdegi CISM qorǵanys vedomstvolarynyń bilim berý uıymdary arasynda ótken týrnır de bar. Qorǵanys mınıstri general-polkovnık Rýslan Jaqsylyqov CISM halyqaralyq áskerı-sporttyq uıymymen baılanystardyń qaıta jandanýyn oń baǵalady jáne kelesi jyly ony basqarýda Qazaqstan Qarýly kúshterine bir oryn beriletinin málimdedi.
TMD aıasynda áskerı sport kesheniniń kópsaıysy, armıalyq qoıan-qoltyq urystan jáne atystan chempıonattar ótti.
Odan bólek Astanada «Qazaqstan Respýblıkasy Qorǵanys mınıstriniń kýbogyna» qoıan-qoltyq urystan álem kýbogynyń fınaly uıymdastyryldy jáne Armıa-generaly S.Q. Nurmaǵambetovty eske alýǵa arnalǵan bokstan halyqaralyq týrnır ótti.
Jyl qorytyndysy: áskerı sportshylarǵa áskerı-qoldanbaly sport túrlerinen 150-den astam sporttyq ataqtar men razrádtar berildi
Halyqaralyq arenada Qarýly kúshterdiń atynan el namysyn Qazaqstannyń eńbek sińirgen 12 sport sheberi, halyqaralyq dárejedegi 77 sport sheberi, Qazaqstan Respýblıkasynyń 70 sport sheberi jáne sport sheberine eki kandıdat qorǵap júr.
Tek bıylǵy jyly joǵary kórsetkishteri úshin áskerı-sport túrlerinen 158 sporttyq ataqtar men razrádtar berildi. Onyń ishinde Qazaqstan Respýblıkasynyń sport sheberi – 37 jáne QR sport sheberine úmitker – 18. QR QM Armıa ortalyq sport klýby ótkizgen chempıonattarda I razrádty – 42 áskerı qyzmetshi; II razrádty – 33 áskerı qyzmetshi jáne III razrádty – 28 áskerı qyzmetshi rastady.
Sporttyq jumystyń qorytyndysy boıynsha esepti nátıjeleri jáne sporttyq-buqaralyq jumysty uıymdastyrǵany úshin Qazaqstan Respýblıkasy Qorǵanys mınıstrliginiń birneshe qurylymdyq bólimsheleri men áskerı qyzmetshileri marapattaldy. Olar Qazaqstan Respýblıkasy Qarýly Kúshteriniń spartakıadasynda jáne Qorǵanys mınıstrliginiń áskerı ókilder ortalyǵynda birinshi oryn alyp, qurylymdyq bólimsheler arasynda úzdik atandy. Aǵa serjant Ásilbek Ómirzaquly Qarabaı QR QK erler arasynda úzdik sportshy, al serjant Aıajan Bolatqyzy Ámirjanova áıelder arasynda úzdik sportshy atandy.
Jyl qorytyndysy: Qarýly Kúshterde AOSK áskerı-sport koleji ashylady
Qazaqstan Respýblıkasynyń Qorǵanys mınıstrligi dene shynyqtyrý jáne sport salasyndaǵy júıeli ózgeristerdi engizýdi jalǵastyrady, áskerı qyzmetshilerdiń balalaryna sporttyq daǵdylardy damytýǵa múmkindik bere otyryp, olarǵa arnalǵan jattyǵýlar da ótkizedi.
2024 jyly «Jas ulan» respýblıkalyq mektebin AOSK áskerı-sport koleji retinde qaıta baǵdarlaý, sondaı-aq Qurlyq áskerleriniń áskerı ınstıtýtynda dene shynyqtyrý jáne sport kýrstaryn qaıta bastaý jospary ázirlenip, iske asyrylmaq. Áskerı kolejge túsý kezinde áskerı qyzmetshilerdiń balalaryna, kóp balaly otbasylardan shyqqan balalarǵa jáne aýyldyq jerlerden kelgen balalarǵa arnalǵan basymdyqtar eskeriletin bolady.
Ulttyq sport túrlerin nasıhattaý baǵdarlamasy aıasynda 2025 jyly Astanada áskerı qyzmetshiler arasynda qazaq kúresinen tuńǵysh ret álem chempıonaty ótedi.
Budan bólek, segiz garnızonnyń sport keshenderinde jáne úsh oqý-jattyǵý ortalyǵynda dzúdo, qazaq kúresi, sambo, boks, shaǵyn fýtbol, ústel tenısi, shahmat jáne doıby, toǵyzqumalaq jáne basqa da sport túrlerinen jeti myńnan astam áskerı qyzmetshiniń balalary tegin jattyǵatyn bolady.