Onyń 90 paıyzy qaıǵyly jaǵdaımen aıaqtalǵan.
Bul Tótenshe jaǵdaılar mınıstrligi keltirgen statısıka, dep habarlaıdy Almaty-akshamy.kz.
Balalar arasynda osyndaı oqys oqıǵalardyń jıileýi jaýapty mekemelerdi de alańdatyp otyr. Al sarapshylar endi elimiz halyqaralyq tájirıbelerge súıenip, búldirshinder qaýipsizdigin kúsheıtý kerek ekenin aıtady.
24.kz arnasynyń málimetine súıensek, ótken jyly elimizde 100-den astam bala terezeden qulap, 25-i kóz jumǵan.
«Birinshiden, mundaı oqıǵalardyń bolý sebebi – ata-analardyń durys qaramaýy balalaryn, qaraýsyz qaldyrýy, abaısyzdyǵy. Barynsha aıtyp jatamyz, úgit-nasıhat jumystary júrgizilip jatady. Úılerdi aralaǵan kezde, órt qaýipsizdigi boıynsha aksıalar kezinde barynsha ata-analarǵa sony eskertip otyramyz. 1 jastan bastap júrýdi úırengen balalar 1 jastan bastap qulaýy múmkin», - deıdi QR Tótenshe jaǵdaılar mınıstrliginń resmı ókili Janna Dáýrenbekova.
Terezeniń arǵy jaǵyndaǵy kórinis balalar úshin qyzyqty ári tańsyq dúnıe. «Kishkentaı zertteýshi» qorshaǵan ortany taný maqsatynda túrli qaýipti áreketterge barady. Oıyn balasynyń terezeden qulaýyna basty sebep – ońaı ashylatyn tereze.
Máselen Amerıkada balalardyń terezeden qulaýyna qarsy arnaıy baǵdarlama bar. Ótken ǵasyrdyń 70-jyldary qolǵa alynǵan bul joba jazataıym oqıǵalardyń aldyn alýdy 50 paıyzǵa azaıtqan. Bul turǵyda qazaqstandyq sarapshylar balalardyń qaýipsizdigin qamtamasyz etý baǵytyndaǵy zańdy kúsheıtý keregin alǵa tartady.
«Jumysty qazirden bastaý kerek. Sheteldik áriptestermen tájirıbe almasý qajet. Balanyń qaýipsizdigine jaýap beretin birneshe baǵyttaǵy arnaıy vedomstvolardy iske qosý mańyzdy. Olardyń qyzmeti naqty aıqyndalsa, kelesi jyldyń sońyna deıin máseleniń 70 paıyzy sheshiler edi», - deıdi QR BUU Balalar qorynyń balalar ómiri boıynsha baǵdarlama úılestirýshisi Anna Statıvkına.
Bıyl elimizde arnaıy norma bekitildi. Ol – balabaqsha men mektepterde jáne turǵyn úılerde qurylys kompanıalarynyń terezege blokırator ornatýyn mindetteıdi.
«Men mınıstrlikter deńgeıinde máseleni retteýge tyrystym. Sebebi olardyń atqarýshy organdarǵa yqpaly bar. Qazir eresekterdiń nazaryn aýdarý úshin kósheniń bárine plakttar ilinýi kerek. Aqparattandyrý jaǵyn kúsheıtýimiz kerek. Bastysy – ata-analar jaýapkershilikti sezinip, balalaryn qaraýsyz qaldyrmaýy qajet. Ázirge balalardyń qaýipsizdigi máselesi tolyǵymen sheshilmeı tur. Arnaıy norma bolǵanymen, tereze qorǵanyshtarynyń sapasyn tekserip jatqan eshkim joq. Ókimet bul baǵyttaǵy zańdy qatańdatsa quba-qup», - deıdi «Meıirimdilik» erikti qoǵamy» qoǵamdyq qorynyń dırektory Arýjan Saıyn.