Almaty qalasyndaǵy tergeý ızolátorynda sot úkimin kútip jatqan kúdiktiler ustalady.
Alyp qalanyń shet jaǵynda ornalasqan abaqtynyń aldy tutqyndaǵylarǵa kerek zattary men tamaq ákelgen adamdardan bir arylmaıdy. Ákelgen ár zatty muqıat tekseretin baqylaýshylar sálemdemelerdiń ishinen nebir tyıym salynǵan zattardy taýyp jatady, dep habarlaıdy Almaty-akshamy.kz Polisia.kz-ke silteme jasap.
Aram nıettiler kóbine sháıdiń ishine, kámpıttiń arasyna, tipten temekiniń ishindegi untaǵyn alyp tastap, ornyna esirtkilik zattar jasyrady. Túrmede jatqandardyń týysqandary men dostary negizinen esirtki zattary men uıaly telefondardy ótkizýge tyrysady. Olar telefonnyń neǵurlym shaǵyn markalaryn tańdaıdy. Ony jasyrýdyń da nebir joldaryn oılap tabady. Mysaly, nannyń ortasyna, aıaq kıimniń ultanyna jasyrsa, sim-kartalardy anyqtaý ońaı emes. Tipten jýyrda baqylaýshylar tis pastasyna jasyrǵan sim-kartany da tapty. Tergeý abaqtasyndaǵy tyıym salynǵan zattardy anyqtaýdyń taǵy bir joly – kameralarda tintý júrgizý.
«Jyl basynan beri Almaty qalasy Qylmystyq-atqarý departamentine qarasty LA-155/18 mekemesinde 33 telefon, 1 lıtr alkogóldik ishimdik, 111,32 gram esirtki zaty jáne aqshalaı 46 000 teńge tárkilendi. Tyıym salynǵan zattardy ótkizýge tyrysqan 19 adamǵa Qazaqstan Respýblıkasy Ákimshilik quqyq buzýshylyq týraly kodeksiniń 481-babyna sáıkes hattama toltyrylyp, materıaldar sotqa jiberildi. Sottyń sheshimimen olar ákimshilik jazaǵa tartylyp, eskertý jasaldy nemese on aılyq eseptik kórsetkish kóleminde aıyppul salyndy», – deıdi rejım jáne kúzet bólimi bastyǵynyń mindetin atqarýshy Asqat Kómekbaev.