Oqý-aǵartý mınıstri Asqat Aımaǵambetov bala sabaǵyna kirispeıtin ata-analarǵa keńes berdi, dep habarlaıdy Almaty-akshamy.kz Baq.kz-ke silteme jasap.
«Bizde ártúrli zertteýler bar. Onyń ishinde TIMSS zertteýi bar ol balalardyń úlgerimin anyqtaıdy. Sondaı-aq PISA atty halyqaralyq zertteý bar. 2019 TIMSS zertteýimen 4 synyp oqýshylarynyń úlgerimin qaradyq. Sonda olardyń úlgerimine qandaı faktorlar áser etti degen suraqqa jaýap izdedik», - dedi Asqat Aımaǵambetov.
Mınıstrdiń sózinshe, zertteýdiń arqasynda naqty faktorlar anyqtalǵan.
«Zertteý nátıjesinde, ortasha eseppen alǵanda, úıdegi ata-analary balalaryna kómektesip, balalarynyń oqýyna aralasatyn otbasynda baǵalary áldeqaıda joǵary boldy. Al bala sabaǵyna kirispeıtin, oǵan nemquraıly qaraıtyn ata-analardyń balalarynyń ortasha baǵasy - 20-25 bal. Bul - naqty kórsetkish», - dedi Asqat Aımaǵambetov «Sanaly urpaq – ult bolashaǵy» atty respýblıkalyq tamyz konferensıasynda.
Osy faktorlardy aıta kele, mınıstr balanyń kásibı jetistikke jetýi onyń ata-anasymen birge kitap oqýy men bilim alýǵa degen jaǵdaıynyń tolyqtaı jasalýyna baılanysty ekenin aıtty.