Bıyl 9 aıdyń ishinde el kóleminde beınebaqylaý kameralarynyń kómegimen 9913 qylmystyń beti ashyldy. Bul týraly QR İshki ister mınıstriniń orynbasary Sáken Sársenov málim etti, dep habarlaıdy almaty-akshamy.kz QazAqparatqa silteme jasap.
«Qoǵamdyq qaýipsizdikti qamtamasyz etýdegi aıtýly sharalardyń biri - kópshilik oryndardy jappaı beınebaqylaý kamerasymen qamtamasyz etý. Beınebaqylaý kamerasyna túsken kez kelgen quqyqbuzýshylyq faktisi sotta nemese tergeý kezinde dálel retinde qoldanylady. Beınebaqylaý júıesi qylmystyń izin sýytpaı ashýǵa, aıǵaqtardy jınaýǵa ǵana emes, onyń aldyn alýǵa da kómektesedi. Qazirgi tańda respýblıka aýmaǵynda 625 myńnan astam beınebaqylaý kamerasy qoıylǵan. Onyń 100 myńǵa jýyǵy jedel basqarý ortalyǵyna tıesili. Bıyl 9 aıdyń ishinde beınebaqylaý kamerasynyń kómegimen respýblıka boıynsha 9 913 qylmys ashyldy», - dedi Sáken Sársenov Ortalyq komýnıkasıalar qyzmetinde ótken baspasóz máslıhatynda.
Sondaı-aq, mınıstr orynbasary beınebaqylaý kamerasynyń kómegimen ashylǵan qylmystardyń birin aıtyp ótti.
«Bıyl 8 qyrkúıekte, túngi saǵat 01:30 shamasynda qonaqtan kele jatqan Petropavl turǵynynyń uıaly telefonyn belgisiz bireý qolynan julyp alyp, mopedke otyryp, sybaılasymen birge qashyp ketken. Jábirlenýshi qylmyskerdiń túrin baıqap úlgermegen, esesine oqıǵa beınebaqylaý kamerasyna túsip qalǵan. Tártip saqshylary 18 jáne 15 jastaǵy eki jasóspirimdi dereý ustady. Urlanǵan zat tárkilendi», - dedi ol.