Búgin «ALTAI-NEWS» medıa-ortalyǵynyń ujymy kompanıaǵa qarasty «DIDAR» jáne «Rýdnyı Altaı» gazetteriniń ardagerlerimen júzdesip, olarǵa zamanaýı tehnologıalardy, sonyń ishinde jasandy ıntellektti qoldana otyryp aqparat jetkizýdiń jańa tásilderin kórsetti, dep habarlaıdy aqshamnews.kz Altainews.kz--ke silteme jasap.
«ALTAI-NEWS» medıa ortalyǵy – óńirdegi memlekettik aqparattyq saıasatty júzege asyryp otyrǵan basty medıa-qural. Onyń quramyna Altainews.kz jelilik basylymy, «DIDAR» jáne «Rýdnyı Altaı» gazetteri, «NEW-media» prodúserlik stýdıasy, áleýmettik jelilerdegi pablıkter, polıgrafıalyq qyzmet baǵyty kiredi.
Qos basylymda uzaq jyldar boıy eńbek etken ardagerler «ALTAI-NEWS» medıa-ortalyǵynyń búgingi tynys-tirshiligimen tanysty.
Aqparat salasyndaǵy zamanýı tehnologıalardy paıdalana otyryp, jumysyn júrgizip kele jatqan ortalyqta qazir 75 adam jumys isteıdi. Ońtaılandyrý jalaqynyń birshama ósýine yqpal etip, qalamaqy tóleý júıesi de túbegeıli ózgerdi.
- Qazirgi ýaqyt talabyna jáne aqparat aǵynynyń jyldamdyǵyna sáıkes gazetter jańalyqtardy, ásirese belgili bir oqıǵalar týraly aqparatty der kezinde jetkize almaıdy. Gazetti shyǵarýdyń ózi úlken qarjylyq shyǵyndar men qyrýar eńbekti qajet etetin jumys. Aqparatty taratýdyń elektrondy ádisteri gazetterdiń básekege qabilettiligin aıtarlyqtaı tómendetip otyr. Óıtkeni, gazet baspahanadan shyǵyp, oqyrmanǵa jetip, oqıǵa týraly habarlaǵansha, saıttar men elektrondy BAQ habar taratyp úlgeredi jáne sáıkesinshe gazet jańalyǵy eskirip qalady. «DIDAR» jáne «Rýdnyı Altaı» gazetteri Shyǵys Qazaqstan oblysynyń ómirinde mańyzdy oryn alatyn tarıhı basylymdar ekendigi daýsyz. Sondyqtan gazet oqyrmandarynyń aýdıtorıasyn keńeıtýdiń joldaryn qarastyrýdy kózdep otyrmyz. Taratýdyń bir túri – gazetterdiń qaǵaz nusqasymen qatar elektrondy nusqasyn da shyǵarý. Búginde kez kelgen adam smartfonynda ınternet bar ekenine úırenip qalǵan. Ómirdiń kóptegen salalary elektrondy formatqa áldeqashan kóshken. Sol sıaqty gazet te naryqtan óz ornyn tabýdy kózdeıdi, - dedi kompanıa basshysy Arsenıı Dúısenov.
Jalpy, gazet ataýlyǵa oqyrmandardyń qyzyǵýshylyǵynyń tómendeýi qazirgi tańda tek óńirde ǵana emes, búkil álemde baıqalyp otyr. Mysaly, Reseıde sońǵy 10 jylda jýrnaldar men gazetter sany 40 paıyzǵa qysqarǵan. Gazetter jedel jańalyqtardyń kózi retinde óz rólin tolyq atqara almaýy aqıqat. Gazetter tek analıtıkalyq jáne salalyq taqyryptardaǵy avtorlyq materıaldardy, jýrnalısik zertteýlerdi kóptep jazýǵa ıtermeleýde. Osy tusy gazettiń basymdylyǵy bolmaq.
Eńbek ardagerlerine qazaqy qonaqjaılyqpen shapan jabylyp, qurmet kórsetildi. Óz kezeginde ardagerler kórsetilgen qurmetke alǵystaryn aıtyp, rızashylyqtaryn bildirdi. Sonymen qatar, ózderi eńbek etken gazettiń bolashaǵyna beı-jaı qaramaıtyndyǵyn jetkizip, usynys-pikirlerin de aıtty.