Almatyda sheteldik kólik júrgizý quqyǵynan aıyrylǵanyna qaramastan jolaýshylar tasymaldaǵan.
Almaty qalasynda patrúldik polısıa qyzmetkerleri jolaýshylar tasymalymen zańsyz aınalysqan sheteldik azamatty anyqtady, dep habarlaıdy aqshamnews.kz.
Polisia.kz-tiń málimetinshe, «Tasymaldaýshy» jedel-profılaktıkalyq is-sharasy barysynda tártip saqshylary «Hyundai» markaly avtokólikti toqtatty. Kólikti kórshiles eldiń azamaty basqarǵany belgili boldy. Ol tanymal tasymaldaý platformalarynyń birinde ózge adamnyń atymen tirkelip, zańsyz taksı qyzmetin atqaryp júrgen.
Tekserý kezinde onyń buryn jol-kólik oqıǵasyna kináli bolyp, júrgizýshi kýáliginen aıyrylǵany anyqtaldy.
– Qazirgi ýaqytta quqyq buzýshy arnaıy ýaqytsha ustaý ızolátoryna qamaldy. Onyń Qazaqstan aýmaǵynan shyǵarý máselesi qaralýda. Kólik quraly aıyppul turaǵyna qoıyldy, – dep málimdedi Almaty qalalyq polısıa departamenti jergilikti polısıa qyzmeti basqarmasy bastyǵynyń orynbasary Tımýr Noǵaıbaev.
Aıta keteıik, Almatyda jolaýshylar tasymaly salasyndaǵy zań buzýshylyqtardy boldyrmaý, qoǵamdyq kólikterdiń qaýipsizdigin arttyrý jáne azamattardyń quqyqtaryn qorǵaý maqsatynda «Tasymaldaýshy» respýblıkalyq is-sharasy ótkizilýde. İs-shara aıasynda qoǵamdyq kólikterdegi kez kelgen zańsyzdyqqa «múldem tózbeýshilik» ustanymy negizinde qatań sharalar qoldanylýda.