Keıingi jyldary júregi aýyratyn, qan aınalymy, ıaǵnı qan qysymy nasharlaǵan orta jastaǵy adamdar kóbeıip barady.
Buryn tek 50-60 jastan asqan jandar ǵana júrek tusynyń aýyratynyn, qan qysymynyń jıi kóterilip ketetinin aıtyp shaǵymdanatyn bolsa, keıingi 3-4 jylda júrek dertine shaldyqqan 40 jastan asqan naýqastar kóbeıdi.
Máselen, 2023 jylǵy málimetterge qarasaq, «Almaty Resort» shıpajaıyna baryp, demalyp ári emdelip jatqan naýqastardyń 60%-ynan júrek-qantamyr júıesinde aqaý bary anyqtalǵan. Paıyzǵa shaqsaq, 36%-y 65 jastan asqandar bolsa, 30%-y 50-65 jas aralyǵynda, al 26%-y 40-50 jas aralyǵy jáne 8%-y 40 jasqa deıingi naýqastar bolyp shyqqan.
Shıpajaıdaǵy joǵary sanatty dáriger kardıolog Botagóz Baqturqyzynyń aıtýynsha, kómek suraǵan ár naýqastyń ereksheligine qaraı em taǵaıyndalady.
“Demalýshy tek aýrýdyń aldyn alý úshin kelgen bolsa, shıpajaıda ol baǵytta emdik is-sharalar keń aýqymda. Eger naýqas aýyryp kelgen bolsa, dári-dármektik emnen bastaımyz, keıin densaýlyǵy qalpyna kelgennen keıin fızıoem, toqpen, balshyqpen emdeý t.s.s em túrlerin qosyp, saýyǵyp shyǵýyna úlken úlesimizdi qosamyz”, - deıdi.
Ońalýǵa kelgen azamattarǵa «Redkord», «Artromot», «Tr.Býbnovskıı» atty jattyǵý apparattary arqyly is-shara qoldanylady.
Sonymen qatar, JQJ aýrýlarynyń aldyn alý maqsatynda bıyl «sýtektik ıngalásıa» emdeý tásili engizilgen. Iaǵnı antıagreganttar (kardıomagnıl, trombo ass, trombopol, aspırınkardıo) ornyna «sýtekpen býlaýdyń» bir kýrsyn alyp óte jaqsy nátıjege jetýge bolady.
Jalpy, jyl basynan beri I toqsanda «Almaty Resort» shıpajaıynda 426 adam júrek qan-tamyr júıesi aýrýlary boıynsha emdelgen. Onyń ishinde ártúrli kategorıada tirkelgen demalýshylar da bar. Al 2023 jylǵy málimetter boıynsha 2 372 demalýshy júrek qan-tamyr júıesi aýrýlary boıynsha em-dom alǵan eken. Munyń ishinde júrek qan-tamyr júıesine ota jasalǵan jáne stasıonarlyq em alǵan naqastar da tirkelgen.
S.D.Asfendıarov atyndaǵy Qazaq Ulttyq medısınalyq ýnıversıtetiniń 2006 jylǵy túlegi Botagóz Dúısenniń kardıologıa salasynda qyzmet etip júrgenine 17 jyldaı ýaqyt bolypty. «Osy salada jumys istep júrgen talaı jylda uǵynǵanym, naýqas azamattardyń kóbi ábden syrqattanyp, emdelmese bolmaıtyndaı jaǵdaıǵa jetkende ǵana keledi. Al bizdiń shıpajaıdyń basqa shıpajaılardan ereksheligi – stasıonarlyq shıpajaımyz. Iaǵnı biz aýrýdyń alý maqsatynda, stasıonarlyq em kórsetý jáne de reabılıtasıa júrgizemiz. Osyndaı jan-jaqty kómek kórsete alatyn ortalyqta jumys isteıtinim maǵan erekshe kúsh-qýat beredi.
«Batamen el kógeredi, jańbyrmen jer kógeredi» demekshi, emdelip, jazylyp shyqqan naýqastardyń batasyna bólenip otyrýdan asqan baqyt joq. Armandaǵan armanyma, kózdegen maqsatyma jetý – men úshin eń bastysy osy!» - deıdi Botagóz Baqturqyzy.